Գերմանիայի կանցլեր Ֆրիդրիխ Մերցը հայտարարել է, որ սառեցված ռուսական ակտիվները պետք է գնան Ուկրաինա, այլ ոչ թե Միացյալ Նահանգներ։

«Դոյչե Վելե»-ի փոխանցմամբ՝ Գերմանիայի կանցլերը դեմ է սառեցված ռուսական ակտիվները Միացյալ Նահանգներ փոխանցելու գաղափարին։ Լրատվամիջոցների հաղորդագրությունների համաձայն՝ այս գաղափարը քննարկվել է ԱՄՆ նախագահ Դոնալդ Թրամփի կողմից վարվող խաղաղության բանակցությունների շրջանակներում։

«Այս գումարը պետք է փոխանցվի Ուկրաինային», – ասել է Ֆրիդրիխ Մերցը։

Նրա խոսքով՝ Ուկրաինան օգնության և ֆինանսական աջակցության կարիք կունենա առաջիկա երկու-երեք տարիների ընթացքում՝ ձմեռային սեզոնը հաղթահարելու համար։

«Մեզ միջոցներ են պետք դրա համար։ Սա Եվրոպայի ներքին հարց է։ Ես չեմ տեսնում որևէ տնտեսական հնարավորություն այդ միջոցները ԱՄՆ փոխանցելու համար, և ԱՄՆ կառավարությունը գիտի դա», – ասել է Ֆրիդրիխ Մերցը։

Նրա խոսքով, ԱՄՆ-ում ոմանք ցանկանում են «որոշակի տնտեսական օգուտներ ստանալ» Ռուսաստանի կողմից Ուկրաինայի դեմ պատերազմի հնարավոր լուծումից։

«Սա օրինական է, բայց սա այն գործողության նպատակը չէ, որը մենք միասին կսկսենք Եվրոպայում առաջիկա օրերին», – ասել է Գերմանիայի կանցլերը։