Ֆրանսիայում «Ադամ» փոթորկի պատճառած ջրհեղեղի հետևանքով առնվազն չորս մարդ է մահացել, մեկը՝ վիրավորվել
Ֆրանսիայում «Ադամ» փոթորկի պատճառած ջրհեղեղի հետևանքով առնվազն չորս մարդ է մահացել, մեկը՝ վիրավորվել, հաղորդում է «Բի Բի Սի»-ն։
Լրատվամիջոցների հաղորդագրությունների համաձայն, փոթորիկը լայնածավալ ջրհեղեղներ է առաջացրել Ֆրանսիայի հարավում, որոնք ողողել են փողոցները և խաթարել երթևեկությունը։
Նրանց տվյալներով՝ Բուշ-դյու-Ռոն շրջանում, նկուղում երկու կին խեղդվել է, իսկ Կորսիկայում մի տղամարդ մահացել է մեքենայի մեջ։ Ոստիկանությունը չորրորդ մահվան մասին լրացուցիչ մանրամասներ չի տրամադրել։
Ինչպես գրում է «Բի Բի Սի»-ն, Մուրի և Սեն-Մարտեն-դը-Կրուա քաղաքների տասնյակ բնակիչներ տեղավորվել են արտակարգ կացարաններում։
Միևնույն ժամանակ, Ֆրանսիայի օդերևութաբանական ծառայությունը՝ Météo-France-ը, հայտարարել է, որ հինգշաբթի երեկոյան մինչև ուրբաթ Ֆրանսիայի հինգ դեպարտամենտներում ուժեղ քամիներ են սպասվում, ինչը նրանց դրդել է նարնջագույն տագնապ հայտարարել։