Ֆինլանդիայի արտաքին գործերի նախարար Էլինա Վալտոնենը քննադատում է ԱՄՆ խաղաղության ծրագիրը։

Վալտոնենի խոսքով՝ եթե լրատվամիջոցներում տարածված տեղեկատվությունը ԱՄՆ-ի և Ռուսաստանի միջև Ուկրաինայի հարցով նախատեսված խաղաղության համաձայնագրի մասին ճիշտ է, ապա այդ պայմանները անընդունելի են Ուկրաինայի և նրան աջակցող եվրոպական երկրների համար։

«Կարծես ծրագիրը գրվել է Մոսկվայում։ Այն լիովին և անվերապահորեն խախտում է ՄԱԿ-ի կանոնադրությունը», – նշում է Վալտոնենը։

Վալտոնենի խոսքով՝ Ֆինլանդիայի և Եվրոպայի դիրքորոշումը հստակ է։

«Մենք ցանկանում ենք արդար և կայուն խաղաղություն Ուկրաինայում։ Մենք դրա վրա աշխատում ենք չորս տարի», – ասել է նախարարը։

Վալտոնենի խոսքով՝ ինքը խաղաղության ծրագրի մասին պաշտոնական տեղեկատվություն չի ստացել ո՛չ ամերիկյան, ո՛չ էլ ուկրաինական կողմից։ Ֆինլանդիայի արտաքին գործերի նախարարի խոսքով՝ խաղաղության ճանապարհը պետք է սկսվի հրադադարից։

«Մենք Ռուսաստանին հրադադար առաջարկեցինք։ Ուկրաինան պատրաստ էր դրան։ Սակայն Ռուսաստանը պատրաստ չէր դրան և որևէ զիջում չգնաց», – նշել է դիվանագետը, ով կարծում է, որ խաղաղության համաձայնագիրը դեռևս հեռու է կնքվելուց։

Վալտոնենը կարևոր է համարում Ուկրաինային աջակցելը՝ ամրապնդելով նրա պաշտպանական կարողությունները և պատժամիջոցներ կիրառելով Ռուսաստանի դեմ։

The Telegraph-ը հայտնել է, որ ԱՄՆ նոր, այսպես կոչված, խաղաղության ծրագրի կետերից մեկն այն է, որ Մոսկվան պետք է վարձ վճարի Ուկրաինային Ռուսաստանի կողմից վերահսկվող Դոնբասի համար։ Ծրագրի համաձայն՝ Ուկրաինայում օտարերկրյա զորքերի տեղակայումը կարգելափակվի, և ԱՄՆ ռազմական օգնությունը կդադարեցվի, ռուսերենը կհայտարարվի պետական ​​լեզու, իսկ Ռուս ուղղափառ եկեղեցուն պաշտոնական կարգավիճակ կտրվի օկուպացված տարածքներում։