Էվերեստ լեռան տիբեթյան կողմում ձնաբքերը մինչև 1000 մարդու են արգելափակել, առատ տեղումները խնդիրներ են առաջացրել նաև Հիմալայներից հարավ գտնվող շրջաններում, իսկ Նեպալում աղետի հետևանքով զոհվել է առնվազն 47 մարդ
Էվերեստի տիբեթյան կողմում ձնաբքի պատճառով գրեթե 1000 մարդ մնացել է արգելափակված։
Լրատվամիջոցների հաղորդագրությունների համաձայն՝ հարյուրավոր տեղացի գյուղացիներ և փրկարարներ փորձում են մաքրել ճանապարհը 4900 մետր բարձրության վրա։
Հրապարակման համաձայն՝ լեռան վրա գտնվող որոշ զբոսաշրջիկներ արդեն տարհանվել են աղետի գոտուց։ Էվերեստի տիբեթյան կողմում ձյունը սկսվել է ուրբաթ երեկոյան և շարունակվել է ամբողջ շաբաթ օրը։
Հորդառատ անձրևները խնդիրներ են առաջացրել Հիմալայների հարավային շրջաններում։ Վերջերս հայտնի դարձավ, որ Նեպալում աղետի հետևանքով զոհվել է առնվազն 47 մարդ։ Ուրբաթ օրը սկսված հորդառատ անձրևները Նեպալում սողանքներ և ջրհեղեղներ են առաջացրել, փակել ճանապարհները և մի քանի կամուրջներ ավերել։ Տեղական լրատվամիջոցների հաղորդմամբ՝ ինը մարդ ներկայումս անհետ կորած է համարվում։
Հնդկաստանը նույնպես պայքարում է աղետի դեմ։ Հնդկաստանի արևելյան լեռնային շրջանում հորդառատ անձրևների հետևանքով առաջացած սողանքի հետևանքով զոհվել է առնվազն յոթ մարդ։
