Թուրքիայի կառավարությունը ժամանակավորապես կդադարեցնի C-130 ռազմական տրանսպորտային ինքնաթիռների թռիչքները, հաղորդում է Euronews-ը։

Թուրքիայի կառավարությունը որոշում է կայացրել Վրաստանում տեղի ունեցած ինքնաթիռի վթարից հետո, որի հետևանքով զոհվել է 20 զինծառայող։

Ըստ Թուրքիայի պաշտպանության նախարարության՝ C-130 ինքնաթիռը կանցնի մանրամասն տեխնիկական զննում։ Նախարարության հայտարարության մեջ ասվում է, որ միայն այն ինքնաթիռները, որոնք հաջողությամբ կանցնեն ստուգումը, կթույլատրվեն վերսկսել թռիչքները։

Ամերիկյան արտադրության C-130 Hercules տրանսպորտային ինքնաթիռները լայնորեն օգտագործվում են Թուրքիայի զինված ուժերի կողմից անձնակազմի տեղափոխման և լոգիստիկ գործողությունների համար։

Ըստ Euronews-ի՝ նոյեմբերի 11-ի ինքնաթիռի վթարի պատճառները դեռևս պարզված չեն, և հետաքննությունը շարունակվում է։

Վրաստանում վթարի ենթարկված ինքնաթիռը Թուրքիան գնել է Սաուդյան Արաբիայից 2012 թվականին և վերանորոգումից հետո շահագործվում է 2014 թվականից։ Ըստ Թուրքիայի պաշտպանության նախարարության՝ ինքնաթիռը հոկտեմբերի 12-ին ենթարկվել է տեխնիկական սպասարկման։

Տրանսպորտային ինքնաթիռը թռչում էր Ադրբեջանից Թուրքիա և վթարի է ենթարկվել Վրաստանում։ Ինքնաթիռում եղել են զինծառայողներ, որոնք սպասարկում էին թուրքական F-16 կործանիչները: Նրանք Ադրբեջանում էին Հաղթանակի օրը նշելու համար։

Մահացածների հուղարկավորությունը տեղի կունենա նրանց մարմինները Թուրքիա տեղափոխելուց և բժշկական զննումից հետո։