Էրդողանն ասում է, որ Հայաստանի հետ հարաբերությունների կարգավորման գործընթացը սկսվել է, հայտարարություն է տարածել նաև ՀՀ արտաքին գործերի նախարարությունը
Հայաստանի համար կարևոր է լավ օգտագործել տարածաշրջանում խաղաղության հնարավորությունը և դրական հարաբերություններ հաստատել Ադրբեջանի հետ,- ասել է Թուրքիայի նախագահ Ռեջեփ Թայիփ Էրդողանը։
Թուրքիայի նախագահի խոսքով, «Ադրբեջանի հողերը օկուպացիայից ազատագրելուց հետո Թուրքիան սկսեց Հայաստանի հետ հարաբերությունների կարգավորման գործընթացը, և ձեռնարկված քայլերը տվեցին ակնկալվող արդյունքները»։
Այսօր Հայաստանի ԱԳՆ-ում հայտարարություն է արվել Թուրքիայի հետ հարաբերությունների կարգավորման վերաբերյալ։ ՀՀ ԱԳՆ խոսնակ Վահան Ունանյանի խոսքով, Հայաստանն ակնկալում է, որ Թուրքիայի հետ երկխոսության գործընթացի արդյունքում Հայաստանի և Թուրքիայի միջև դիվանագիտական հարաբերություններ կհաստատվեն և երկու երկրների միջև սահման կբացվի։
Հունվարի 14-ին Մոսկվայում տեղի կունենա Հայաստանի և Թուրքիայի հատուկ բանագնացների առաջին հանդիպումը։