Ֆրանսիայի նախագահ Էմանուել Մակրոնը աջակցություն է հայտնել Մոլդովային՝ նշելով, որ Փարիզը Քիշնևի կողքին է եվրաինտեգրման ճանապարհին։

«Չնայած միջամտության և ճնշման փորձերին, մոլդովացի քաղաքացիների ընտրությունը վճռականորեն հաստատվել է։ Ֆրանսիան աջակցում է Մոլդովային նրա եվրոպական նախագծում, ինչպես նաև ազատության և ինքնիշխանության ձգտման մեջ», – գրել է Էմանուել Մակրոնը սոցիալական ցանցերում։

Տեղեկության համար, ըստ Կենտրոնական ընտրական հանձնաժողովի, ձայների գրեթե 100 տոկոսի հաշվարկից հետո եվրոպամետ «Գործողության և համերաշխության կուսակցությունը» ստացել է ձայների 50.16 տոկոսը։ Երկրորդ տեղում է նախկին նախագահ Իգոր Դոդոնի գլխավորած ռուսամետ «Հայրենասիրական դաշինքը»՝ 24.19 տոկոսով։ «Այլընտրանք», «Մեր կուսակցություն» և «Արժանապատվության և ճշմարտության հարթակ» ընտրական դաշինքները հաղթահարել են անցողիկ շեմը։ Նախնական տեղեկությունների համաձայն, «Գործողության և համերաշխության կուսակցությունը» կստանա պարզ խորհրդարանական մեծամասնություն՝ 52 տեղով։ «Հայրենասիրական դաշինքը» կունենա 28 պատգամավոր, «Այլընտրանք» դաշինքը՝ ինը, իսկ «Մեր կուսակցությունը» և «Արժանապատվության և ճշմարտության հարթակը» խորհրդարան կմտնեն վեցական մանդատով։

Մոլդովայի խորհրդարանական ընտրություններում մասնակցությունը գերազանցել է 52 տոկոսը։