Ըստ ԶԼՄ-ների՝ Ռուսաստանի գլխավոր պետական սանիտարական բժիշկը հանձնարարական է տվել, որ Ռուսաստանի մարզերը պատրաստվեն սև ժանտախտի կանխարգելմանը
Ռուսաստանի գլխավոր պետական սանիտարական բժիշկ, «Ռոսպոտրեբնադզորի» ղեկավար Աննա Պոպովան հանձնարարական է տվել, որ Ռուսաստանի մարզերը պատրաստվեն սև ժանտախտի կանխարգելմանը։
Համապատասխան որոշումը հրապարակվել է ուրբաթ օրը իրավաբանական տեղեկատվության պաշտոնական պորտալում։
«Ապահովել Ռուսաստանի Դաշնության սուբյեկտների լիազոր գործադիր մարմինների և բժշկական մարմինների պատրաստվածությունը, որն ուղղված կլինի սև ժանտախտի տարածման կանխարգելմանը` հաշվի առնելով Ռուսաստանում հայտնաբերված բնական օջախների առկայության համաճարակային ռիսկերին»,- նշվում է փաստաթղթում։
Փաստաթղթում նշվում է նաև, որ մարզերում առաջարկվում է բնակչությանը տեղեկացնել ժանտախտի կանխարգելման միջոցառումների, այդ թվում՝ համաճարակաբանական ցուցումների հիման վրա իմունիզացիայի անհրաժեշտության մասին։
Միաժամանակ, ըստ լրատվամիջոցների, հայտնի է դարձել, որ Մոնղոլիայում, այդ թվում՝ Ռուսաստանի և Չինաստանի սահմանին, հայտնաբերվել է սև ժանտախտի 137 օջախ։