Երկրով մեկ զանգվածային բողոքի ցույցեր են տեղի ունեցել ԱՄՆ նախագահ Դոնալդ Թրամփի քաղաքականության դեմ: Հանրահավաքները անցկացվում են «Ո՛չ թագավորներին» կարգախոսի ներքո: Բոլոր 50 նահանգներում նախատեսված էր ավելի քան 3200 միջոցառում: Սա Թրամփի դեմ բողոքի ցույցերի երրորդ ալիքն է նմանատիպ կարգախոսով:

Կազմակերպիչները նշում են, որ բողոքում են ԱՄՆ նախագահ Դոնալդ Թրամփի քաղաքականության դեմ, այդ թվում՝ Իրանի դեմ պատերազմի, դաշնային ներգաղթային ծառայության գործողությունների և բնակարանների գների բարձրացման դեմ:

«Թրամփը ցանկանում է կառավարել որպես բռնակալ: Բայց սա Ամերիկան ​​է, և իշխանությունը պատկանում է ժողովրդին, այլ ոչ թե նրանց, ովքեր ցանկանում են դառնալ թագավորներ կամ իրենց միլիարդատեր ընկերները», – ասել են կազմակերպիչները:

Մարտի 28-ին ցույցեր են անցկացվել ամբողջ օրվա ընթացքում ԱՄՆ գրեթե բոլոր խոշոր քաղաքներում, այդ թվում՝ Նյու Յորքում, Վաշինգտոնում և Լոս Անջելեսում: Ցուցարարները կրում էին Թրամփի, փոխնախագահ Ջեյ Դի Վենսի և վարչակազմի այլ պաշտոնյաների խրտվիլակներ և կոչ էին անում նրանց հեռացնել և ձերբակալել:

Բողոքի ցույցերը չեն անցել առանց միջադեպերի: Լոս Անջելեսում երկու մարդ ձերբակալվել է դաշնային իրավապահ մարմինների աշխատակիցների վրա հարձակվելու համար: Դալասում նույնպես ձերբակալություններ են կատարվել «փոքր բախումներից» հետո, երբ հակացուցարարները փակել են փողոցները և խափանել «Ոչ թագավորներին» երթը։

ԱՄՆ մի քանի նահանգներ մոբիլիզացրել են Ազգային գվարդիան։