ԱՄՆ նախագահ Դոնալդ Թրամփը սոցիալական ցանցում տեսանյութ է հրապարակել, որտեղ պատկերված է Իրանի Քարաջ քաղաքի կամրջին հասցված հարվածը։

Տեսանյութում երևում է, թե ինչպես է փլուզվում կամուրջը, որի վրա հարձակում է իրականացվել։

Թրամփը հայտարարում է, որ ԱՄՆ-ն ոչնչացրել է Իրանի ամենամեծ կամուրջը, և Թեհրանը պետք է համաձայնագիր կնքի, քանի դեռ դրա ժամանակն ունի։

«Իրանի ամենամեծ կամուրջը փլուզվում է, և այն այլևս երբեք չի օգտագործվի. դեռ շատ բան կա առջևում: Ժամանակն է, որ Իրանը համաձայնագիր կնքի, քանի դեռ շատ ուշ չէ, և ոչինչ չի մնացել նրանից, ինչը կարող էր մեծ երկիր դառնալ», – գրել է Թրամփը սոցիալական ցանցում:

Կամրջի վրա հարձակման վերաբերյալ տեղեկատվություն է տարածում նաև իրանական մամուլը։ Նրանց խոսքով՝ հարձակումների հետևանքով առնվազն երկու մարդ է զոհվել։

ԱՄՆ պաշտպանության դեպարտամենտը կամրջի վրա հարձակման վերաբերյալ դեռևս մեկնաբանություն չի արել։