Դոնալդ Թրամփ. Մենք երբեք չենք մոռանա սեպտեմբերի 11-ի ահաբեկչական հարձակումը, այդ պատճառով էլ այսօր պայքարում ենք
Մենք երբեք, երբեք չենք մոռանա սեպտեմբերի 11-ի ահաբեկչական հարձակումը, այդ պատճառով էլ այսօր պայքարում ենք,- ասել է ԱՄՆ նախագահ Դոնալդ Թրամփը 2001 թվականի սեպտեմբերի 11-ի ահաբեկչական հարձակումների 25-ամյակին նվիրված Պենտագոնում կայացած միջոցառման ժամանակ։
Նրա խոսքով՝ ահաբեկչական հարձակման հետևանքով մեծ թվով մարդիկ են զոհվել և վիրավորվել։
«Մեր աշխարհը կորցրեց 2977 գեղեցիկ հոգի, և շատերն էլ մահացան հաջորդած շաբաթների և տարիների ընթացքում՝ սարսափելի, լուրջ վնասվածքներից։ Այնքան շատ մարդիկ նման տրավմա են կրել։ Մենք երբեք, երբեք չենք մոռանա նրանց։ Ահա թե ինչու ենք մենք այսօր պայքարում։ Մենք այլընտրանք չունենք։ Միայն հաղթանակն է հնարավոր։ Մենք պայքարում ենք համառորեն։ Մենք պայքարում ենք հաղթանակի համար», – ասել է Թրամփը։
Բացի այդ, ԱՄՆ նախագահը հիշել է սեպտեմբերի 11-ի ահաբեկչական հարձակումների զոհերի պատմությունները և նշել, որ այսօր նաև ծառայում է հիշելու համար, թե «ինչպես է Ամերիկան արձագանքել չարիքին»։
«Հարձակումներից հետո այդ դժվար օրերին մենք տեսանք մեր ազգի իրական ոգին։ Այդ օրը մենք բոլորս նյույորքցիներ էինք։ Մեզանից յուրաքանչյուրը։ Մենք բոլորս նյույորքցիներ էինք, բայց մենք բոլորս ամերիկացիներ էինք։ Մենք բոլորս մեկ ընտանիք էինք», – ասաց Թրամփը։
Բացի այդ, Թրամփը կրկնեց, որ Իրանը երբեք միջուկային զենք չի ունենա։
«Մենք հարգանքի տուրք ենք մատուցում այն զինծառայողներին, ովքեր ներկայումս աշխատում են ապահովելու համար, որ ահաբեկչության առաջատար պետական հովանավորը՝ Իրանի Իսլամական Հանրապետությունը, երբեք միջուկային զենք չունենա», – ասաց Դոնալդ Թրամփը։