Դոնալդ Թրամփ. Իրանը հարցնում է, թե արդյոք պատժամիջոցները կարող են չեղարկվել, ես պատրաստ եմ լսել նրանց, տեսնենք՝ ինչ կլինի, ես բաց եմ դրա համար
President Donald Trump addresses during the ASEAN US Summit in Kuala Lumpur, Malaysia, Sunday, Oct. 26, 2025. (AP Photo/Vincent Thian, Pool)
ԱՄՆ նախագահ Դոնալդ Թրամփի հայտարարությամբ՝ Իրանը հետաքրքրվում է, հնարավոր է արդյոք իրենց դեմ սահմանված ամերիկյան պատժամիջոցների վերացումը։
Այս մասին հայտնում է «Ռոյթերս»-ը։
«Իրանը հարցնում է՝ կարելի՞ է արդյոք վերացնել պատժամիջոցները։ Իրանի նկատմամբ շատ խիստ պատժամիջոցներ են սահմանված։ Ես պատրաստ եմ լսել, կտեսնենք, ինչ դուրս կգա։ Ես բաց եմ այդ հարցում», – հայտարարել է Դոնալդ Թրամփը։
ՄԱԿ-ում Իրանի դիվանագիտական առաքելությունը «Ռոյթերս»-ի հարցմանը պատասխան չի տվել։
Նշենք, որ շաբաթվա սկզբին Իրանի հոգևոր առաջնորդ այաթոլլա Ալի Խամենեին հայտարարել էր, որ Իրանի և ԱՄՆ-ի միջև համագործակցությունը հնարավոր չէ, քանի որ Վաշինգտոնը շարունակում է աջակցել Իսրայելին, պահում է ռազմական բազաներ և միջամտում Մերձավոր Արևելքի հարցերին։
Դոնալդ Թրամփի՝ Սպիտակ տուն երկրորդ անգամ վերադառնալուց հետո վերսկսվել է Իրանի նկատմամբ «առավելագույն ճնշման» արշավը, որը հիմնականում ուղղված է եղել Իրանի կողմից միջուկային զենքի ստեղծումը կանխարգելելուն։ Այս տարվա հունիսին ԱՄՆ-ը հարվածներ է հասցրել Իրանի միջուկային օբյեկտներին։
Երկու երկրների միջև միջուկային թեմայով կայացել է հինգ բանակցային փուլ, մինչ Իսրայելի և Իրանի միջև սկսվեց 12-օրյա պատերազմը։ Սակայն այդ բանակցությունները արդյունք չեն տվել։