«Ես համաձայն եմ երկու շաբաթ ժամկետով կասեցնել Իրանի ռմբակոծությունը, դա կլինի երկկողմանի հրադադար», – այս մասին հայտարարել է ԱՄՆ նախագահ Դոնալդ Թրամփը։

Ինչպես նշել է Թրամփը, Իրանի վրա հարձակման կասեցման պայմաններից մեկն այն է, որ Իրանը համաձայնի Հորմուզի նեղուցի ամբողջական բացմանը։

«Պակիստանի վարչապետ Շեհբազ Շարիֆի և ֆելդմարշալ Ասիմ Մունիրի հետ զրույցի հիման վրա, ովքեր խնդրել են ինձ կասեցնել Իրանի դեմ այս գիշեր նախատեսված կործանարար ուժի կիրառումը, և այն պայմանով, որ «Իրանի Իսլամական Հանրապետությունը» կհամաձայնի Հորմուզի նեղուցի ամբողջական, անհապաղ և անվտանգ բացմանը, ես համաձայն եմ երկու շաբաթ ժամկետով կասեցնել Իրանի ռմբակոծությունն ու նրա վրա հարձակումը։ Սա կլինի երկկողմանի հրադադար։ Դրա պատճառն այն է, որ մենք արդեն հասել և գերազանցել ենք բոլոր ռազմական նպատակները և շատ մոտ ենք Իրանի հետ երկարաժամկետ խաղաղության և Մերձավոր Արևելքում խաղաղության վերաբերյալ վերջնական համաձայնագրին», – գրում է Թրամփը։

Նրա խոսքով՝ ԱՄՆ-ն Իրանից ստացել է 10 կետից բաղկացած առաջարկ, և դա հիմք է բանակցությունների համար։

«Մենք Իրանից ստացել ենք 10 կետից բաղկացած առաջարկ և հավատում ենք, որ դա պիտանի հիմք է բանակցությունների համար։ Անցյալի գրեթե բոլոր հիմնական վիճահարույց հարցերն արդեն համաձայնեցված են Միացյալ Նահանգների և Իրանի միջև, իսկ երկշաբաթյա ժամանակահատվածը մեզ թույլ կտա համաձայնագիրը վերջնականապես ձևակերպել և ավարտին հասցնել։ Թե՛ որպես նախագահ, թե՛ որպես Մերձավոր Արևելքի երկրների ներկայացուցիչ, ինձ համար պատիվ է, որ այս երկարաժամկետ խնդիրը մոտ է լուծմանը», – գրում է Թրամփը։