Դմիտրի Պեսկովը հայտարարում է, որ ժանտախտի հետազոտական ինստիտուտի լաբորատորիայի աշխատակցի մահվան հետ կապված իրավիճակի մասին տեղեկությունների մեծ մասը կեղծ են
Ռուսաստանը Սիբիրում ժանտախտի դեմ պայքարի հետազոտական ինստիտուտում լաբորատորիայի աշխատակցի մահվան մասին Առողջապահության համաշխարհային կազմակերպությանը տեղեկացրել է սահմանված ընթացակարգերին համապատասխան․ այս մասին հայտարարել է Կրեմլի մամուլի քարտուղար Դմիտրի Պեսկովը։
Բացի այդ, Պեսկովը լրատվամիջոցներին մեղադրել է կեղծ տեղեկատվություն տարածելու մեջ։
Ինչպես գրում է «Ռոյթերս»-ը, Կրեմլի մամուլի քարտուղարը նկատի ունի ABC News-ի տեղեկությունը, ըստ որի՝ ԱՄՆ-ն Ռուսաստանին պաշտոնական դիվանագիտական բողոք է հղել: Լրատվամիջոցը նշում էր, որ Վաշինգտոնը Մոսկվայից պահանջում է ավելի մեծ թափանցիկություն միջադեպի առնչությամբ:
«Լրատվամիջոցները շատ տեղեկատվություն են լուսաբանում, և այս իրավիճակի մասին տարածված տեղեկությունների մեծ մասը կեղծ են»,- նշում է Դմիտրի Պեսկովը։
Ի գիտություն, մի քանի օր առաջ Իրկուտսկի Սիբիրի և Հեռավոր Արևելքի ժանտախտի դեմ պայքարի հետազոտական ինստիտուտում աշխատող լաբորանտ Դարյա Շիպիլովան մահացել է: Տեղեկություն էր տարածվել, որ Դարյա Շիպիլովայի՝ լաբորատորիայում աշխատելու ընթացքում վնասվել է ժանտախտի հարուցիչ պարունակող փորձանոթը: Այս վարկածը պաշտոնական գերատեսչությունները չեն հաստատում: