Դեյվիդ Մաքալիսթերը, Նիլ Ուշակովսը, Սերգեյ Լագոդինսկին և Ռասա Յուկնևիչիենեն կոչ են արել պատժամիջոցներ կիրառել Վրաստանի քաղաքական առաջնորդների դեմ
Եվրախորհրդարանի չորս պատգամավորներ հայտարարություն են տարածել Վրաստանի վերաբերյալ: Հայտարարությունը ստորագրել են Եվրախորհրդարանի արտաքին հարաբերությունների կոմիտեի նախագահ Դեյվիդ Մաքալիսթերը, ԵՄ-Վրաստան միջխորհրդարանական ասոցացման կոմիտեի պատվիրակության նախագահ Նիլ Ուշակովսը, Եվրանեսթ խորհրդարանական վեհաժողովի պատվիրակության նախագահ Սերգեյ Լագոդինսկին և արտաքին հարաբերությունների կոմիտեի Վրաստանի հարցով մշտական զեկուցող Ռասա Յուկնևիչիենեն։
«Մենք դատապարտում ենք վրացական իշխանությունների կողմից դեմոկրատական ընդդիմության նկատմամբ ուժեղացված բռնաճնշումները և խաղաղ ցուցարարների նկատմամբ ավելորդ ուժի կիրառումը։ Ընդդիմության անդամներին ձերբակալելը և նրանց գրասենյակները խուզարկելը ավտորիտար ռեժիմների գործիքների մի մասն է և անընդունելի է Եվրամիությանն անդամակցելու հավակնող երկրի համար։ «Վրացական երազանքն» ուղղակիորեն պատասխանատու է երկրի ժողովրդավարական հետընթացի և եվրոպական ուղուց դրամատիկ հեռանալու համար, ինչը դեմ է Վրաստանի բնակչության ճնշող մեծամասնության կամքին։ Երկրով մեկ շարունակվող բողոքի ցույցերը Վրաստանի ներկայիս ղեկավարության օրոք համատարած վրդովմունքի օրինական արտահայտությունն են։
Մենք կոչ ենք անում ԵՄ-ին և նրա անդամ երկրներին անձնական պատժամիջոցներ սահմանել քաղաքական առաջնորդների դեմ, ովքեր պատասխանատու են ընտրախախտումների և քաղաքացիների նկատմամբ շարունակվող բռնաճնշումների համար։ Նաև ցանկանում ենք կրկնել մեր պահանջը՝ նպատակաուղղված պատժամիջոցներ սահմանելու Բիձինա Իվանիշվիլիի դեմ, ով քաղաքական պատասխանատու է բռնաճնշումների ալիքի և եվրաինտեգրման գործընթացի դադարեցման համար։ Վրաստանը կեղծված ընտրությունները պետք է նորից անցկացնի, որոնք կանցկացվեն բարելավված ընտրական միջավայրում, անկախ և անաչառ ընտրական վարչակազմի կողմից, խիստ միջազգային մոնիտորինգով, ապահովելով իսկապես արդար և թափանցիկ գործընթաց։
Մենք մեր լիակատար աջակցությունն ենք հայտնում նախագահ Սալոմե Զուրաբիշվիլիին, ով շարունակում է մնալ ժողովրդավարության և Վրաստանի եվրոպական ինտեգրման հավատարիմ պաշտպանը։ Եվրախորհրդարանը աջակցում է Վրաստանի խիզախ ժողովրդին և եվրոպական ապագայի նրանց ընտրությանը»,- ասվում է հայտարարության մեջ։
