Deutsche Welle – Կանադան Գերմանիային կվերադարձնի վերանորոգված տուրբինը՝ «Հյուսիսային հոսք» գազատարի անխափան շահագործման համար
Կանադան Գերմանիային կվերադարձնի վերանորոգված տուրբինը՝ «Հյուսիսային հոսք» գազատարի անխափան շահագործման համար։ Այս մասին, ըստ «Deutsche Welle»-ի, հայտնել է Կանադայի բնական պաշարների նախարար Ջոնաթան Ուիլկինսոնը։
Ուիլկինսոնի խոսքով՝ տուրբինի վերադարձը Գերմանիա կօգնի Եվրոպային հուսալի և մատչելի էներգիա ստանալ, մինչդեռ Եվրամիությունը շարունակում է դադարեցնել ռուսական նավթն ու գազը։ Նրա խոսքով, վտանգ կա, որ Ռուսաստանը կդադարեցնի «Հյուսիսային հոսք» գազատարի շահագործումը, ինչը լուրջ խնդիրների մեջ կդնի Գերմանիայի տնտեսությունը, իսկ իրենք՝ գերմանացիները, վտանգի տակ կհայտնվեն, քանի որ չեն կարողանա տաքացնել իրենց տները ձմռան ընթացքում։
Հունիսի սկզբին «Գազպրոմը» կրճատեց գազի մատակարարումները Գերմանիա։ Ընկերությունից հայտնել են, որ պատժամիջոցների պատճառով գերմանական «Siemens» ընկերությունը հրաժարվել է փոխանցել բնական գազի մատակարարման համար անհրաժեշտ տուրբինների վերանորոգման համար համապատասխան մասերը, ինչը անհնարին է դարձրել տուրբինների շահագործումը լրիվ ծանրաբեռնվածությամբ։
Կանադայում վերանորոգված տուրբինը նախ կհանձնվի Գերմանիային, իսկ Գերմանիան այն կհանձնի Գազպրոմին, որպեսզի ռուսական պետական ընկերությունը դադարեցնի տուրբինների թեմայի շահարկումները և վերականգնի պայմանագրով նախատեսված չափով բնական գազի մատակարարումը։
Ինչպես գրում է «Deutsche Welle»-ն, Կիևը հորդորել է Օտտավային չվերադարձնել տուրբինները և Բեռլինին մեղադրել է Ռուսաստանի շանտաժին հետևելու մեջ։