Վրաստանի դատախազությունը մեղադրանք է առաջադրել երեք անձի՝ խորհրդարանի մոտ տեղի ունեցած բողոքի ակցիայի ժամանակ ոստիկանների վրա հարձակվելու և այլոց գույքը վնասելու համար։

Ինչպես նշվում է դատախազության տեղեկության մեջ, ՆԳՆ-ի իրականացրած քննությամբ պարզվել է, որ նոյեմբերի 29-ին Թբիլիսիում, Ռուսթավելի պողոտայում ընթացող բողոքի ակցիայի ժամանակ մեղադրյալներից մեկը պիրոտեխնիկա է նետել Հատուկ առաջադրանքների վարչության աշխատակիցների վրա, ովքեր այնտեղ էին հասարակական կարգը պաշտպանելու համար։ Արդյունքում նրանցից մեկը վնասվածք է ստացել ոտքի շրջանում՝ այրվածքի տեսքով։

«Քննությամբ պարզվել է նաև, որ նույն օրը երկրորդ մեղադրյալը այրել է խորհրդարանի շենքի ճակատային մասում տեղադրված 112 արտակարգ իրավիճակների կառավարման կենտրոնի հաշվեկշռի տեսահսկման համակարգը։

Ինչ վերաբերում է ևս մեկ մեղադրյալի, քննությամբ պարզվել է, որ նա դեկտեմբերի 1-ին բողոքի ակցիայի ժամանակ հրկիզել է խորհրդարանի շենքի սենյակներից մեկը, որի ժամանակ վնասվել և ոչնչացվել են սենյակի իրերը։

Իրավապահները դեկտեմբերի 1-ին ձերբակալել են բոլոր երեք մեղադրյալներին։ Նրանցից մեկին մեղադրանք է առաջադրվել Վրաստանի քրեական օրենսգրքի 353-րդ պրիմա հոդվածի առաջին մասով (ոստիկանի վրա հարձակում՝ ոստիկանի ծառայողական գործունեության հետ կապված), որը նախատեսում է ազատազրկում 4-ից 7 տարի ժամկետով, և երկու մեղադրյալի՝ 187 հոդվածի երկրորդ մասով (Հրդեհի միջոցով ուրիշի գույքին վնաս պատճառելը, որը պատճառել է զգալի վնաս), որը նախատեսում է ազատազրկում՝ 3-ից 6 տարի ժամկետով։

Դատախազության միջնորդության հիման վրա երեք ամբաստանյալների նկատմամբ էլ որպես խափանման միջոց է կիրառվել ազատազրկումը։

Քրեական գործերի նախաքննությունը շարունակվում է»,- նշված է դատախազության տեղեկատվության մեջ