Վրաստանի դատախազությունը մեղադրանք է առաջադրել չորս անձանց կազմակերպված խմբի կողմից խոշոր չափի գումարի խարդախությամբ յուրացման համար։

Ըստ դատախազության՝ Ներքին գործերի նախարարության կողմից անցկացված հետաքննությունը պարզել է, որ մեղադրյալները Բաթումիում վարձակալել են բնակելի շենքեր և անշարժ գույք գրավադրելով համոզել են շահագրգիռ կողմերին, որ իրավունք ունեն վարկի դիմաց գրավադրել նշված բնակարանները և դրանք ժամանակավոր օգտագործման համար փոխանցել նրանց, ինչի արդյունքում խարդախությամբ 16 զոհերից յուրացրել են 461,306 լարի։

Իրավապահ մարմինների աշխատակիցները Բաթումիում մեղադրյալներին ձերբակալել են դատավորի որոշման հիման վրա։ Նրանց մեղադրանք է առաջադրվել Վրաստանի քրեական օրենսգրքի 180-րդ հոդվածի 3-րդ մասի «բ» և «ա» ենթակետերով (կազմակերպված խմբի կողմից խոշոր չափի գումարի խարդախությամբ յուրացում), որը որպես պատժի ձև և չափ նախատեսում է մինչև 10 տարի ազատազրկում։

Մեղադրողի միջնորդության հիման վրա դատարանը բոլոր չորս մեղադրյալներին արդեն սահմանել է կալանք՝ որպես խափանման միջոց։