Վրաստանի դատախազությունը քրեական գործ է հարուցել «Կրիստալ Գրուփ»-ի սեփականատեր Վլադիմիր Ստեփանյանի դեմ՝ անօրինական ձեռնարկատիրական գործունեության և անօրինական եկամուտների օրինականացման փաստերի վերաբերյալ։ Դատախազությունը տեղեկատվություն է հրապարակել այս մասին։

«Դեպքի հետաքննությունը պարզել է, որ «Բակուրիանի բիզնես խումբ» ՍՊԸ-ի հիմնական գործունեությունը, որը «Կրիստալ» խմբի մաս է կազմում, Բակուրիանի ավանում հյուրանոցային տիպի բնակելի համալիրների կառուցումն ու հետագա վաճառքն էր։

Վլադիմիր Ստեփանյանը, որը փաստացի կառավարում էր ձեռնարկության առօրյա գործունեությունը, կոպտորեն խախտել է ինչպես Բակուրիանի ավանի զարգացման գլխավոր պլանը, այնպես էլ համապատասխան ծառայությունից ստացված շինարարական թույլտվության պայմանները։ Նա աստիճանաբար օտարել է անօրինական կառուցված բնակելի տարածքները։

Այսպիսով, «Բակուրիանի բիզնես խումբ» ՍՊԸ-ն ստացել է խոշոր չափի եկամուտ՝ 1 894 925 լարի։

Ստացված խոշոր գումարին օրինական ձև տալու համար մեղադրյալը գումարի մի մասը տեղադրել է «Բակուրիանի բիզնես խումբ» ՍՊԸ-ի բանկային հաշիվներում, իսկ մյուս մասը փոխանցել է շարժական գույքի, որից հետո ձեռնարկության, իր և նրա հետ կապված անձանց անունով ձեռք է բերել անշարժ/շարժական գույք։

Կալանավորվածին մեղադրանք է առաջադրվել Վրաստանի քրեական օրենսգրքի 192-րդ և 194-րդ հոդվածներով նախատեսված ապօրինի ձեռնարկատիրական գործունեության և անօրինական եկամուտների օրինականացման համար, որը նախատեսում է մինչև տասներկու տարի ազատազրկում որպես պատժի ձև և չափ։

«Դատախազությունը օրենքով սահմանված ժամկետում կդիմի դատարան՝ մեղադրյալի նկատմամբ որպես խափանման միջոց կալանք կիրառելու համար», – ասվում է դատախազության հայտարարության մեջ։