Վրաստանի դատախազությունում ընթացող քննչական գործընթացի շրջանակում մի քանի հասարակական կազմակերպությունների բանկային հաշիվների վրա դրվել է կալանք։

Մասնավորապես, ինչպես նշվում է դատախազության կողմից տարածված տեղեկատվության մեջ, Թբիլիսիի քաղաքային դատարանը բավարարել է դատախազության միջնորդությունը՝ Հայաստանի սահմանադրական կարգի և ազգային անվտանգության հիմունքների դեմ ուղղված գործունեության, սաբոտաժի, ծանրացուցիչ հանգամանքներով սաբոտաժի փորձի, օտարերկրյա կազմակերպությունների և օտարերկրյա վերահսկողության ներքո գործող կազմակերպությունների թշնամական գործունեությանը օժանդակելու համար ֆինանսավորման մոբիլիզացման փաստով իրականացվող քննության շրջանակում մի շարք հասարակական կազմակերպությունների բանկային հաշիվների վրա կալանք դնելու վերաբերյալ։

Գերատեսչության պարզաբանմամբ, նշված հասարակական կազմակերպությունների գործունեությունը գերազանցել է իրենց կանոնադրությամբ սահմանված նպատակները, և ստացված ֆինանսների զգալի մասը օգտագործվել է ապօրինի գործողությունների համար։

Դատախազությունում հայտնում են, որ բանկային հաշիվների վրա դրված կալանքի միջոցով սահմանափակվել է դրամական միջոցների հետագա ոչ նպատակային օգտագործումը։

«Քննությամբ պարզվել է, որ 2024 թվականի ընթացքում Վրաստանի խորհրդարանի առջև և երկրի տարբեր վայրերում տեղի են ունեցել բողոքի ակցիաներ, որոնք կարճ ժամանակում վերաճել են բռնության և դուրս են եկել օրենքով սահմանված շրջանակներից։ Ակցիաների ընթացքին զուգահեռ՝ ընդդիմադիր կուսակցությունների առաջնորդների և մի շարք հասարակական կազմակերպությունների ղեկավարների կոչերը՝ զանգվածային անհնազանդության և համընդհանուր դիմադրության վերաբերյալ, աստիճանաբար վերածվել են ոստիկանության ուժերի հետ բախումների՝ կանխամտածված բնույթ կրելով։ Արդյունքում, բռնի խմբերը վնասել են իրավապահ մարմինների տասնյակ աշխատակիցների առողջությունը, կիրառվել են հրավառություն, դյուրավառ և հրկիզման նյութեր, այդ թվում՝ այսպես կոչված «Մոլոտովի կոկտեյլներ»։ Բռնի խմբերը հրկիզել են խորհրդարանի շենքը, ինչի արդյունքում զգալի վնաս է պատճառվել օրենսդիր մարմնին։ Հրդեհվել է նաև ոստիկանության տեխնիկան, վնասվել է պետական և մասնավոր սեփականություն՝ Ռուսթավելիի պողոտայում։

Իրավապահների դեմ բռնության կազմակերպման նպատակով ակցիայի որոշ մասնակիցներ զինվել էին հատուկ գազային դիմակներով, սաղավարտներով, դեմքի ծածկոցներով, բժշկական դիմակներով, պաշտպանիչ ակնոցներով, մահակներով և այլ միջոցներով։ Բացի այդ, արձանագրվել են բազմաթիվ դեպքեր, երբ ակցիայի մասնակիցները ոստիկանների նկատմամբ կիրառել են պղպեղային սփրեյ և այլ նմանատիպ միջոցներ։

Քննությամբ հաստատվել է, որ իրավապահների դեմ բռնություն գործադրած մասնակիցների զինումը տեղի է ունեցել կոորդինացված ձևով՝ այդ թվում՝ հասարակական կազմակերպությունների միջոցներով։ Մասնավորապես, Ա(Ա)Հ «Քաղաքացիական հասարակության հիմնադրամի», Ա(Ա)Հ «Արդար ընտրությունների և ժողովրդավարության միջազգային ընկերակցության», Ա(Ա)Հ «Տեղեկատվության ազատության զարգացման ինստիտուտի», Ա(Ա)Հ «Ժողովրդավարության պաշտպանների», Ա(Ա)Հ «Վրաստանի ժողովրդավարական նախաձեռնության», Ա(Ա)Հ «ՍԱՖԱՐԻ», Ա(Ա)Հ «Սոցիալական արդարության կենտրոնի» ֆինանսները օգտագործվել են այնպիսի սարքավորումների ձեռքբերման համար, ինչպիսիք են՝ հատուկ գազային դիմակներ, պաշտպանիչ ակնոցներ, բժշկական դիմակներ, դեմքի ծածկոցներ, պղպեղային սփրեյ և այլ միջոցներ, որոնք ակտիվորեն կիրառվել են ոստիկանության հետ բախումների ընթացքում։

Այս կազմակերպությունների ղեկավարները բացահայտ կոչ էին անում հասարակությանը՝ անհնազանդության և դիմադրության, միևնույն ժամանակ նրանց կազմակերպչական և ֆինանսական գործունեությունը ամբողջությամբ ուղղված էր բռնության մեջ ներգրավված անձանց և նրանց ընտանիքների ֆինանսական աջակցությանը։ Վճարվել են տուգանքներ, ապահովվել է պաշտպանություն և լուծվել են անձնական ու կազմակերպչական այլ հարցեր։ Նշված գործողությունների նպատակը, մի կողմից՝ անօրինական գործողություններ իրականացնող անձանց խրախուսումն էր, իսկ մյուս կողմից՝ նրանց հովանավորումը։ Արդյունքում, համակարգված գործողությունների նպատակը եղել է իրավապահ մարմինների թուլացումը և նրանց բնականոն գործունեության խաթարումը։

Քանի որ նշված հասարակական կազմակերպությունների գործունեությունը գերազանցել է իրենց կանոնադրական նպատակները, և ստացված ֆինանսների զգալի մասը ուղղվել է ապօրինի գործողությունների ֆինանսավորմանը, դատարանի որոշմամբ՝ օգոստոսի 27-ին նշված կազմակերպությունների բանկային հաշիվների վրա դրվել է կալանք, ինչի արդյունքում սահմանափակվել է դրամական միջոցների հետագա ոչ նպատակային օգտագործումը», – նշվում է դատախազության հաղորդագրության մեջ։

Դատախազությունում պարզաբանել են, որ քննչական գործընթացի ընթացքի և արդյունքների մասին հասարակությանը պարբերաբար կտրամադրեն տեղեկատվություն։