Ֆինանսների նախարար Լաշա Խուցիշվիլիի հայտարարությամբ, 2021 թվականին երկրի բյուջեն կավելանա մոտ 1,5 միլիարդ լարիով։ Ինչպես նա նշել է, բացի առողջապահական կարիքներից, հատկացվել է լրացուցիչ գրեթե մեկ միլիարդ լարի։ Ընդհանուր առմամբ, ըստ նախարարի, 2021 թվականին համավարակի դեմ պայքարի միջոցառումների վրա ծախսվել է երկու միլիարդ լարի։

«Բացի այդ, տարվա ընթացքում լրացուցիչ միջոցներ են հատկացվել ենթակառուցվածքային նախագծերի ֆինանսավորման և տնտեսության վերականգնման ծրագրերի համար։ Չնայած բյուջեի մեծածավալ աճին, մեզ հաջողվել է զգալիորեն կրճատել բյուջեի դեֆիցիտը և ծրագրված 7,6 տոկոսի փոխարեն դրա փաստացի ցուցանիշը կազմել է 6,1 տոկոս»,- այս մասին ֆինանսների նախարար Լաշա Խուցիշվիլին հայտարարել է «Նախարարի ժամ» ձևաչափով ելույթ ունենալիս:

Նրա խոսքով, համավարակի և դրան ի պատասխան ձեռնարկվող քայլերի ազդեցության տակ պարտքի ծավալը 2020 թվականին գերազանցել է 60 տոկոսը և նույն ցուցանիշը նախատեսվում է 2021 թվականին։

«Սակայն անցյալ տարի բարձր տնտեսական աճի հաշվին հնարավոր եղավ էապես բարելավել այս պարամետրը։ 2021 թվականին կառավարության պարտքի հարաբերակցությունը նվազել է 10 տոկոսային կետով՝ հասնելով ՀՆԱ-ի 50 տոկոսի», – ասել է ֆինանսների նախարար Լաշա Խուցիշվիլին։