Չինաստանը Ռուսաստանի քաղաքացիների համար փորձաշրջանային անվիզա ռեժիմ կսահմանի
Չինաստանի կառավարությունը Ռուսաստանի քաղաքացիների համար փորձնական անվիզա ռեժիմ կսահմանի։ Տեղեկատվությունը տարածում են ռուսական լրատվամիջոցները՝ հղում անելով Չինաստանի արտաքին գործերի նախարարությանը։
Լրատվամիջոցների հաղորդագրությունների համաձայն՝ սեպտեմբերի 15-ից սկսած Ռուսաստանի քաղաքացիները կկարողանան Չինաստան մուտք գործել առանց վիզայի՝ անձնագիրը ներկայացնելու դեպքում։ Պեկինը բացատրել է, որ Ռուսաստանի քաղաքացիները կկարողանան Չինաստանում առանց վիզայի մնալ 30 օր։
Ինչպես հաղորդում է Չինաստանի արտաքին գործերի նախարարությունը, Ռուսաստանի քաղաքացիների համար անվիզա ռեժիմը ժամանակավորապես կգործի մինչև 2026 թվականի սեպտեմբերի 14-ը։
Տեղեկատվության համար՝ ներկայումս Չինաստան առանց վիզայի կարող են մուտք գործել միայն դիվանագիտական և ծառայողական անձնագրեր ունեցող Ռուսաստանի քաղաքացիները։ Բացի այդ, Պեկինը և Մոսկվան համաձայնագիր են ստորագրել խմբային զբոսաշրջային ուղևորությունների մասնակիցների համար անվիզա ռեժիմի վերաբերյալ։
Տեղեկատվության համար՝ Ռուսաստանի նախագահ Վլադիմիր Պուտինը Չինաստան է ժամանել օգոստոսի 31-ին։ Սեպտեմբերի 2-ին Պուտինը երկկողմ բանակցություններ կանցկացնի Չինաստանի առաջնորդ Սի Ցզինպինի հետ։