Չեխիայի Հանրապետությունը պատժամիջոցներ է կիրառել Վրաստանի հինգ քաղաքացիների նկատմամբ։ Որոշումը կայացվել է Չեխիայի կառավարության այսօրվա նիստում։

Չեխիայի արտաքին գործերի նախարարության տվյալներով՝ պատժամիջոցներ կիրառված անձինք պատասխանատու են անցյալ տարվա և ներկայիս բողոքի ցույցերի ժամանակ բռնի միջամտության համար։

Պատժամիջոցները կիրառվել են ներքին գործերի փոխնախարար Ալեքսանդրե Դարախվելիձեի նկատմամբ, ով, ըստ Չեխիայի արտաքին գործերի նախարարության, հրապարակայնորեն պաշտպանել է իրավապահ մարմինների աշխատակիցների կողմից ցուցարարների նկատմամբ ուժի և բռնության կիրառումը։

Պատժամիջոցների ցանկում են նաև դատավորներ Կոբա Չագունավան, Նինո Գալուստաշվիլին, Միխեիլ Ջինջոլիան և դատախազ Լաշա Կոտրիկաձեն։

Պատժամիջոցների տակ գտնվող անձանց արգելվում է մուտք գործել Չեխիա, ինչպես նաև չեխական կազմակերպությունների հետ ցանկացած ֆինանսական գործարք կատարել։ Չեխիայում նրանց ունեցած ցանկացած ակտիվ նույնպես կբռնագրավվի։

Չեխական լրատվամիջոցները հաղորդում են, որ «Վրաստանի իշխանությունները շարունակում են կալանավորել եվրոպամետ ընդդիմության անդամներին երկրում շարունակվող բողոքի ցույցերի ֆոնին, որոնք հիմնված են անցյալ տարվա հոկտեմբերին տեղի ունեցած վիճահարույց խորհրդարանական ընտրությունների և կառավարության կողմից ԵՄ անդամակցության բանակցությունները կասեցնելու հետագա որոշման վրա»։

Չեխիայի արտաքին գործերի նախարար Յան Լիպավսկու խոսքով՝ նմանատիպ միջոցներ արդեն ձեռնարկել են Մեծ Բրիտանիան, ԱՄՆ-ն, Ուկրաինան, Լիտվան, Լատվիան և Էստոնիան։ Սակայն, նրա խոսքով, ԵՄ-ում դեռևս կոնսենսուս չկա վրացի պաշտոնյաների նկատմամբ պատժամիջոցներ կիրառելու վերաբերյալ։