Բենիամին Նեթանյահուն Իսրայելի բանակին հրամայել է պատրաստվել Հորդանան գետի արևմտյան ափի ամբողջական փակմանը և շրջափակել Հեբրոն քաղաքը, որպեսզի կանխվի «Համաս»-ի կողմից ահաբեկչական հարձակման սպառնալիքը

Իսրայելի վարչապետ Բենիամին Նեթանյահուի վարչակազմը հայտարարել է, որ անվտանգության ուժերին հրաման է տրվել շրջափակել Հեբրոնը և պատրաստվել Պաղեստինի տարածքի ամբողջական փակմանը։

«Քիչ առաջ ավարտեցի անվտանգության գնահատումը պաշտպանության նախարարի, Իսրայելի պաշտպանության բանակի գլխավոր շտաբի պետի, ազգային անվտանգության հարցերով խորհրդականի և Իսրայելի պաշտպանության բանակի Կենտրոնական հրամանատարության հրամանատարի հետ։ Ինչպես երևում է, «Համաս»-ի ահաբեկիչները ծրագրում էին մասշտաբային հարձակում, որի նպատակն էր անմեղ խաղաղ բնակիչների սպանությունը, ինչի մասին վկայում է հայտնաբերված հսկայական քանակությամբ զենքն ու ռազմամթերքը։ Մեր քաջարի զինվորները խիզախությամբ և վճռականությամբ խափանեցին այդ հարձակումը։ Գովաբանում եմ նրանց գործողությունները և մեր վիրավորներին մաղթում շուտափույթ ապաքինում։ Ես հանձնարարել եմ Իսրայելի պաշտպանության բանակին և անվտանգության ուժերին անհապաղ շրջափակել Հեբրոն քաղաքը և անվտանգության լրացուցիչ միջոցներ ձեռնարկել Հուդայից և Սամարիայից բխող ահաբեկչական հարձակումները կանխելու համար», – հայտարարել է Նեթանյահուն։

Մինչ այդ Իսրայելի բանակը հայտնել էր, որ սպանել է երկու զինված անձանց, որոնք կրակ էին բացել խաղաղ բնակիչների ուղղությամբ։ Արդյունքում վիրավորվել է հինգ մարդ։ Նրանց խոսքով՝ կանխվել է «ահաբեկչական հարձակում Իսրայելի խաղաղ բնակչության դեմ», ընդ որում՝ զինված անձինք իրենց հետ ունեցել են M16 տեսակի հրացան և ատրճանակ։