Բելգիայում նախատեսվում է ստեղծել ռազմական ստորաբաժանում՝ բողոքի ակցիաների ընթացքում անվտանգությունն ապահովելու համար
Լայնածավալ բողոքի ցույցերի և բռնի անկարգությունների ֆոնին՝ Բելգիայի կառավարությունը դիտարկում է նոր շարժական ստորաբաժանում ստեղծելու հնարավորությունը։ Այս ստորաբաժանման, որը կհամալրվի ռազմական պատրաստություն անցած անձնակազմով, հիմնական խնդիրը կլինի հասարակական անվտանգության ապահովումը անկարգությունների ժամանակ։ Այս մասին հայտնում են բելգիական լրատվամիջոցները։
Այս նոր ստորաբաժանման ստեղծման նախաձեռնությունը, որը ստացել է «Ժանդարմերիա 2.0» (Gendarmerie 2.0) անվանումը, կապված է եվրոպական մայրաքաղաքներում՝ մասնավորապես Բրյուսելում և Փարիզում, վերջերս տեղի ունեցած բռնի անկարգությունների հետ։
Ըստ Բելգիայի պաշտպանության նախարար Թեո Ֆրանկենի՝ այս հարցի շուրջ խորհրդակցություններն արդեն ընթանում են պաշտպանության և ներքին գործերի նախարարությունների միջև։
«Մեզ անհրաժեշտ է ռազմական պատրաստություն ունեցող օպերատիվ ռեզերվ։ Երբ բռնությունը նման մասշտաբների է հասնում, մենք պետք է կարողանանք պաշտպանել մեր քաղաքացիներին», – նշել է Ֆրանկենը։
Թեո Ֆրանկենը հավելել է, որ նախաձեռնության մասին տեղեկացված է նաև Բելգիայի վարչապետ Բարտ դե Վևերը։
Բելգիայում այս նոր ստորաբաժանման ստեղծման շուրջ քննարկումները հաջորդում են հոկտեմբերի 17-ին Բրյուսելում տեղի ունեցած անկարգություններին։ Քաղաքի կենտրոնում տեղի ունեցած բողոքի ցույցերի ժամանակ, որոնց մասնակցում էին երիտասարդներ, ցուցարարները վնասել են խանութներ, ինչպես նաև հրկիզել աղբամաններն ու տրանսպորտային միջոցները։ Ոստիկանությունը կիրառել է արցունքաբեր գազ և ջրցան մեքենաներ։