Բելգիայում համընդհանուր գործադուլ է սկսվել՝ կապված կենսաթոշակային տարիքի բարձրացման հետ, ինչը կաթվածահար է արել օդային և երկաթուղային տրանսպորտը
Բելգիայում համընդհանուր գործադուլ է ընթանում՝ կապված կենսաթոշակային նոր բարեփոխման հետ, որը կաթվածահար է արել օդային և երկաթուղային տրանսպորտը։ Այս մասին գրում է Reuters-ը։
Հունվարի 1-ից Բելգիայում կենսաթոշակային տարիքը 65-ից հասցվել է 66-ի և մինչև 2030 թվականը կհասցվի 67-ի, ինչը հանգեցրել է հասարակական բողոքի:
Բրյուսելի օդանավակայանի չվերթերի գրեթե կեսը չեղարկվել է օդանավակայանի աշխատակիցների գործադուլի պատճառով։ Տասնյակ հազարավոր ուսուցիչներ նույնպես միացել են համազգային գործադուլին, ինչի հետևանքով ամբողջ երկրում փակվել են դպրոցները:
Ազգային երկաթուղային օպերատորը՝ NMBS-ը, ասաց, որ միայն սահմանափակ թվով գնացքներ են շարժվում ամբողջ երկրում:
Ինչպես հայտնում է Reuters-ը, գործադուլը զգալի ազդեցություն է ունեցել նաև Բելգիայի մայրաքաղաք Բրյուսելի հասարակական տրանսպորտի վրա։