Բարսելոնայում գործադուլ անող ուսուցիչները փակել են Սագրադա Ֆամիլիայի մուտքը։ Իսպանական լրատվամիջոցները հաղորդել են, որ Կատալոնիայում ուսուցիչները գործադուլ են հայտարարել տարածաշրջանային բյուջեի և կրթության հարցերի շուրջ ընթացող բանակցությունների ֆոնին։

Գործադուլ անողները փակել են Բարսելոնայի Սագրադա Ֆամիլիայի մուտքը։

Ուսուցիչները «մարդկային շղթա» են կազմել՝ մոտակա դպրոցից սեղաններ և աթոռներ բերելով դեպի տաճար՝ փողոցում ժամանակավոր դասասենյակ ստեղծելու համար։

Բողոքի ակցիայի կազմակերպիչներից մեկի խոսքով՝ Բարսելոնան «պետք է ավելի քիչ ներդրումներ կատարի զբոսաշրջության մեջ և ավելի շատ՝ հիմնարար իրավունքների, ինչպիսին է կրթության իրավունքը, պաշտպանության մեջ»։

Վերջին շաբաթներին իսպանացի ուսուցիչները գործադուլ են հայտարարել ոչ միայն Կատալոնիայում։ Բողոքի ակցիաներ են անցկացվել նաև Վալենսիայում և Մադրիդում։ Ուսուցիչները դժգոհություն են հայտնել մեկ ուսուցչի հաշվով աշակերտների չափազանց մեծ թվից, կրթական հաստատություններում անբավարար պայմաններից և հատուկ կարիքներ ունեցող աշակերտների համար օգնականների պակասից։