Վրաստանի ազգային բանկի տվյալներով՝ 2025 թվականի ապրիլի դրությամբ Վրաստանի միջազգային արժութային պահուստները աճել են 208 միլիոն ԱՄՆ դոլարով և կազմել 4.5 միլիարդ ԱՄՆ դոլար։

Վրաստանի Ազգային բանկի տվյալներով՝ միջազգային արժութային պահուստները երկրի մակրոտնտեսական կայունության կարևոր երաշխավորն են։

«Ազգային բանկի երկարաժամկետ քաղաքականությունը միշտ ուղղված է եղել միջազգային պահուստների կուտակմանը և պահուստային ակտիվների արդյունավետ կառավարմանը։ Հատկանշական է, որ ընթացիկ ժամանակահատվածում, շուկայական բարենպաստ պայմանների շնորհիվ, Ազգային բանկը շարունակում է համալրել պահուստները։ Օրինակ՝ մարտ ամսվա տվյալներով կատարվել են 101.7 միլիոնի զուտ գնումներ, իսկ ապրիլ ամսվա վիճակագրությունը կհրապարակվի մայիսի 27-ին»։

2025 թվականի ապրիլի դրությամբ միջազգային արժութային պահուստների ընդհանուր ծավալում ոսկու բաժինը կազմում է 16.8% (757.7 միլիոն ԱՄՆ դոլար): «Ոսկու գների աճի պատճառով, ապրիլ ամսվա տվյալներով, պահուստների ծավալը նախորդ ամսվա համեմատ աճել է 42.9 միլիոն ԱՄՆ դոլարով, ինչը ընդգծում է Ազգային բանկի պահուստների դիվերսիֆիկացման ռազմավարության վավերականությունը», – նշվում է տեղեկատվության մեջ։

Վրաստանի Ազգային բանկը պաշտոնական միջազգային պահուստների վերաբերյալ թարմացված տվյալները կհրապարակի 2025 թվականի հունիսի 9-ին։