Այսօրվանից ստուգվելու է տրանսպորտային միջոցների շահագործման ընթացքում առաջացող աղմուկի մակարդակը

Այսօրվանից Ներքին գործերի նախարարության լիազորված ստորաբաժանումները կստուգեն ճանապարհային երթևեկության պայմաններում տրանսպորտային միջոցների շահագործման ընթացքում առաջացող աղմուկի մակարդակը։

Աղմուկը կստուգվի գերատեսչության կողմից ձեռք բերված շարժական աղմուկի մակարդակի չափման սարքերի հավաքածուի միջոցով՝ համաձայն միջազգային ISO 5130:2019 ստանդարտի։

ՆԳՆ-ի հաղորդմամբ՝ տրանսպորտային միջոցների շահագործման ընթացքում առաջացող աղմուկի թույլատրելի նորմերը կարգավորվում են Վրաստանի կառավարության համապատասխան որոշմամբ։

Որոշման համաձայն՝ գիշերը՝ ժամը 23:00-ից մինչև 08:00-ն, բնակելի տարածքներում տրանսպորտային միջոցների շահագործման ընթացքում առաջացող աղմուկը չպետք է գերազանցի 80 դեցիբելը։

Վրաստանի վարչական իրավախախտումների օրենսգրքի համաձայն՝ Վրաստանի օրենսդրությամբ սահմանված նորմը գերազանցող աղմուկ առաջացնող տրանսպորտային միջոց վարելը առաջացնում է 100 լարի տուգանք և վարորդական իրավունքի համար տրված միավորների 10 միավորով նվազեցում, նույն արարքի կրկնակի կատարումը՝ 200 լարի տուգանք և վարորդական իրավունքի համար տրված միավորների 20 միավորով նվազեցում, իսկ երրորդ և յուրաքանչյուր հաջորդ դեպքը՝ 300 լարի տուգանք և վարորդական իրավունքի համար տրված միավորների 30 միավորով նվազեցում։