Վրաստանի արտաքին գործերի նախարարությունը հայտարարություն է տարածել Ժնևի միջազգային բանակցությունների 65-րդ փուլի վերաբերյալ։

Արտգործնախարարության հաղորդմամբ, բանակցությունների շրջանակներում վրացական պատվիրակությունը կենտրոնացել է Ռուսաստանի կողմից հրադադարի համաձայնագրով ստանձնած պարտավորությունների լիարժեք կատարման անհրաժեշտության և օկուպացված տարածքներից ներքին տեղահանված անձանց և փախստականների իրենց տներ անվտանգ և արժանապատիվ վերադարձի վրա։

«2025 թվականի նոյեմբերի 11-12-ը տեղի ունեցավ Ժնևի միջազգային բանակցությունների 65-րդ փուլը, որին վրացական պատվիրակությունը գլխավորում էր արտաքին գործերի փոխնախարար Լաշա Դարսալիան։

Բանակցությունների ընթացքում վրացական պատվիրակությունը կենտրոնացավ Ժնևի միջազգային բանակցությունների օրակարգի հիմնական հարցերի վրա, ինչպիսիք են՝ Ռուսաստանի կողմից 2008 թվականի օգոստոսի 12-ի Եվրամիության միջնորդությամբ կնքված հրադադարի համաձայնագրով ստանձնած իր միջազգային պարտավորությունների լիարժեք կատարման անհրաժեշտությունը, ինչպես նաև օկուպացված տարածքներից ներքին տեղահանված անձանց և փախստականների անվտանգ և արժանապատիվ վերադարձը իրենց տներ։

Շեշտադրվեց Գալիում միջադեպերի կանխարգելման և դրանց վրա արձագանքման մեխանիզմի (IPRM) վերականգնման կարևորությունը առանց որևէ նախապայմանի և վերոնշյալ մեխանիզմը Գալիում և Էրգնեթիում պարբերաբար՝ հիմնարար սկզբունքներին համապատասխան իրականացնելու կարևորությունը։

Վրացական կողմը կտրուկ բարձրացրեց օկուպացված տարածքների հարցը, տարածաշրջաններում անվտանգության, մարդասիրական և մարդու իրավունքների ծանր իրավիճակը և օկուպացիոն ռեժիմների ապակառուցողական գործողությունները։ Մտահոգություն հայտնվեց վերջին գործողությունների վերաբերյալ, ինչպիսիք են Սուխումի օդանավակայանի անօրինական բացումը, որը խախտում է միջազգային իրավունքի հիմնարար սկզբունքներն ու նորմերը, կանոնավոր չվերթների մեկնարկը, Ռուսաստանից Սուխումի երկաթուղային և ծովային ուղևորափոխադրումները։

Ռուսաստանի և նրա օկուպացիոն ռեժիմների ներկայացուցիչները, ինչպես միշտ, լքեցին բանակցությունների սեղանը օրակարգի հիմնական հարցերից մեկի շուրջ, որը վերաբերում էր օկուպացված տարածքներից ներքին տեղահանված անձանց և փախստականների իրենց տները վերադարձին։ Արդյունքում, նախորդ փուլերի նման, բանակցությունների 65-րդ փուլը նույնպես ձախողվեց։

Ժնևի միջազգային բանակցությունները ստեղծվել են 2008 թվականին՝ Եվրամիության միջնորդությամբ։ «Օգոստոսի 12-ի հրադադարի համաձայնագրի հիման վրա քննարկվող հիմնական հարցերն են հրադադարի համաձայնագրի իրականացումը, ներքին տեղահանված անձանց և փախստականների անվտանգ և արժանապատիվ վերադարձը իրենց տներ, ինչպես նաև ռուսական օկուպացիայի հետևանքով ստեղծված անվտանգության և մարդասիրական խնդիրները», – ասվում է Վրաստանի արտաքին գործերի նախարարության հայտարարության մեջ։