ԱՄՆ-ում, Վիրջինիայի պետական համալսարանում տեղի ունեցած կրակոցների հետևանքով վիրավորվել է հինգ մարդ, միջադեպին մասնակցել է մեկից ավելի զինված անձ
ԱՄՆ-ում, Վիրջինիայի պետական համալսարանում տեղի ունեցած կրակոցների հետևանքով վիրավորվել է հինգ մարդ, որոնցից մեկը գտնվում է ծանր վիճակում, հաղորդում է «Բի Բի Սի»-ն։
Համալսարանի տեղեկատվությամբ, իրավապահ մարմինները միջադեպի մասին հաղորդում են ստացել տեղական ժամանակով մոտավորապես ժամը 01:28-ին։ Կրակոցները տեղի են ունեցել համալսարանի հանրակացարանի մոտ։
Ոստիկանության հաղորդմամբ, վիրավորներից մեկը համալսարանի ուսանող է, իսկ մյուսը՝ 18 տարեկանից փոքր անձ։
Ոստիկանության տվյալներով՝ միջադեպին մասնակցել է մեկից ավելի զինված անձ։ Այս պահին կասկածյալներ չեն ձերբակալվել։
Համալսարանի տվյալներով՝ համալսարանի տարածքում մնում է «նշանակալի» թվով իրավապահ մարմինների աշխատակիցներ։
Վիրջինիայի պետական համալսարանի կայքի համաձայն՝ նոր ուսումնական կիսամյակը պետք է սկսվեր երկուշաբթի օրը, իսկ ուսանողների համար նախատեսված հանրակացարանները բացվել են ուրբաթ օրը։
Վիրջինիայի պետական համալսարանում սովորում է մոտ 5000 ուսանող։