ԱՄՆ պատերազմի քարտուղարի օգնականի տեղակալը հանդիպումներ է ունեցել Վրաստանի պաշտպանության նախարարությունում

17:16, 21.09.2026

Վրաստանի պաշտպանության նախարարությունը հյուրընկալել է ԱՄՆ պատերազմի քարտուղարի օգնականի տեղակալ Էնդրյու Լումիսին։

Պաշտպանության նախարարության հաղորդմամբ, Էնդրյու Լումիսը հանդիպում է ունեցել Վրաստանի փոխվարչապետ, պաշտպանության նախարար Իրակլի Չիքովանիի հետ։

Նախարարության տվյալներով՝ հանդիպման ժամանակ քննարկվել են Վրաստանի և ԱՄՆ-ի միջև պաշտպանության ոլորտում համագործակցության հարցերը և ապագա հեռանկարները։

«Զրույցը շոշափել է տարածաշրջանի անվտանգության միջավայրը և մարտահրավերները, վրացական և ամերիկյան զինվորականների երկարաժամկետ համատեղ ներդրումը միջազգային առաքելություններում, վրաց-ամերիկյան համատեղ զորավարժություններում և այլ ծրագրերում։

Վրաստանի պաշտպանության նախարարություն կատարած այցի ընթացքում ԱՄՆ պատերազմի քարտուղարի օգնականի տեղակալը հանդիպում է ունեցել պաշտպանության նախարարի առաջին տեղակալ Պաատա Պատիաշվիլիի և պաշտպանության ուժերի հրամանատարի տեղակալ, գեներալ-մայոր Իրակլի Ճիճինաձեի հետ։

Պաշտպանության նախարարության ղեկավարները շնորհակալություն են հայտնել Էնդրյու Լումիսին և պատվիրակությանը այցի համար և ընդգծել այցի կարևորությունը պաշտպանության ոլորտում երկկողմ կապերի ամրապնդման գործում։

Հանդիպումներին մասնակցել են Վրաստանում ԱՄՆ գործերի ժամանակավոր հավատարմատար Քորթնի Օստրիանը և ԱՄՆ ռազմական կցորդ գնդապետ Ջոնաթան Ադամսը, ինչպես նաև ԱՄՆ պատվիրակության անդամները», – նշվում է տեղեկատվության մեջ։

Նմանատիպ