ԱՄՆ պաշտպանության նախարարությունը լրացուցիչ ծովային հետևակայիններ և մի քանի ռազմանավեր է ուղարկում Մերձավոր Արևելք: Այս մասին հաղորդում է «Wall Street Journal»-ը՝ հղում անելով երեք ամերիկացի պաշտոնյաների:

Նրանց խոսքով՝ Պենտագոնի ղեկավար Փիթ Հեգսեթը հաստատել է ԱՄՆ կենտրոնական հրամանատարության խնդրանքը, որը պատասխանատու է Մերձավոր Արևելքում ամերիկյան ուժերի համար:

Հրամանատարությունը խնդրել է արագ արձագանքման դեսանտային խումբ ուղարկել, որը սովորաբար բաղկացած է մի քանի նավից և մոտ հինգ հազար ծովային հետևակայիններից:

Հրապարակման երկու աղբյուրները հայտնում են, որ «Տրիպոլի» դեսանտային նավը Ճապոնիայից ուղևորվում է Մերձավոր Արևելք, որի նավի վրա ծովային հետևակայիններ կան:

Ինչպես նշում է «Wall Street Journal»-ը, ԱՄՆ ծովային հետևակայիններն արդեն տեղակայված են տարածաշրջանում, և լրացուցիչ ուժեր են ուղարկվում ԱՄՆ ռազմական նախարարության խնդրանքով:

«Wall Street Journal»-ը գրում է, որ ԱՄՆ-ն այս քայլին է դիմել այն բանից հետո, երբ իրանական հարձակումները կաթվածահար են արել Հորմուզի նեղուցում երթևեկությունը, քաոս են առաջացրել համաշխարհային տնտեսությունում և բարձրացրել վառելիքի գները:

Իր հերթին, ըստ «Associated Press»-ի աղբյուրի, ԱՄՆ-ն Մերձավոր Արևելք է ուղարկում առնվազն մեկ ռազմանավ՝ «Տրիպոլի»-ն, և 2500 ծովային հետևակային։

Գործակալությունը նշում է, որ սա ուժերի զգալի տեղաշարժ է, սակայն դա չի նշանակում, որ ԱՄՆ-ն պլանավորում է ցամաքային ռազմական գործողություն։

Պենտագոնի ներկայացուցիչը հրաժարվել է մեկնաբանել այս հարցը։