Մենք տարիների ընթացքում ԱՄՆ-ից ուժեղ աջակցություն ենք ստացել երկրի տարածքային ամբողջականության և չճանաչման քաղաքականության հանդեպ: Հետևաբար, սա կլինի ևս մեկ ուժեղ ուղերձ,որն իր հետ կբերի պետքարտուղարը,- այս մասին հայտարարել է ԱՄՆ-ում Վրաստանի դեսպան Դավիթ Բաքրաձեն, ԱՄՆ-ի պետքարտուղար Մայք Պոմպեոյի Վրաստան այցի մասին խոսելիս:

Բաքրաձեի խոսքով, Մայք Պոմպեոյի այցը կօգտագործվի ԱՄՆ-Վրաստան հարաբերությունների վերին հետագիծը շարունակելու համար:

«ԱՄՆ-ի և Վրաստանի միջև ռազմավարական գործընկերությունը բոլոր ժամանակների ամենաբարձր մակարդակում է: Այս այցը դրա ևս մեկ ապացույց է: Պետքարտուղարի բարձր մակարդակի հանդիպումները Վրաստանում, իհարկե, նվիրված կլինեն մեր ռազմավարական գործընկերության բոլոր ոլորտների էլ ավելի խորացմանը: Մենք տարիների ընթացքում ԱՄՆ-ից ուժեղ աջակցություն ենք ստացել երկրի տարածքային ամբողջականության և չճանաչման քաղաքականության հանդեպ: Հետևաբար, սա կլինի ևս մեկ ուժեղ ուղերձ,որն իր հետ կբերի պետքարտուղարը: Մենք խորացնում ենք մեր հարաբերությունները ռազմավարական գործընկերության բոլոր ոլորտներում ՝ լինի դա պաշտպանական և անվտանգության, տնտեսական, առևտրային ժողովրդավարության կամ որևէ այլ ուղղությամբ և  իհարկե, այս այցը կօգտագործվի այս հարաբերությունների վերին ուղին շարունակելու համար»,- հայտարարել է Բաքրաձեն:

Նոյեմբերի 17-ին երկօրյա պաշտոնական այցով Վրաստան է ժամանելու ԱՄՆ-ի պետքարտուղար Մայք Պոմպեոն: Այցի շրջանակներում պետքարտուղարը հանդիպումներ կունենա վարչապետ Գիորգի Գախարիայի, Վրաստանի նախագահ Սալոմե Զուրաբիշվիլու և արտաքին գործերի նախարար Դավիթ Զալկալիանիի հետ: Մայք Պոմպեոն Թբիլիսիում հանդիպում կունենա նաև Համայն Վրաստանի կաթողիկոս-պատրիարք Իլիա Երկրորդի հետ: