Վրաստանի վարչապետ Իրակլի Ղարիբաշվիլին կառավարության այսօրվա նիստում խոսել է մարտի 15-17-ին Բրյուսել նախատեսված այցի մասին:

Նրա խոսքով, այցի շրջանակներում տեղի կունենան բարձր մակարդակի հանդիպումներ ինչպես Եվրահանձնաժողովում, այնպես էլ Եվրոպական խորհրդում և ՆԱՏՕ-ում:

«Ես ուզում եմ մեկ անգամ ևս պարզաբանել բնակչությանը, որ մենք մարտի 15-17-ին այցելելու ենք Բրյուսել: Այս այցի շրջանակներում մենք նախատեսել ենք բարձր մակարդակի հանդիպումներ Եվրահանձնաժողովում, ինչպես նաև Եվրոպական խորհրդում և ՆԱՏՕ-ում: Մարտի 16-ին տեղի կունենա Եվրամիություն-Վրաստան ասոցացման խորհրդի վեցերրորդ նիստը, որին մենք կներկայացնենք մեր երկրի նշանակալի առաջընթացը և առաջընթացը Վրաստանում մի շարք ոլորտներում բարեփոխումների իրականացման գործում», – ասել է Ղարիբաշվիլին:

Իրակլի Ղարիբաշվիլին ևս մեկ անգամ շնորհակալություն հայտնեց Եվրոպական խորհրդի նախագահ Շառլ Միշելին և նշեց, որ գնահատում է իր աջակցությունը Վրաստանին:

Միևնույն ժամանակ, Ղարիբաշվիլին հայտարարել է, որ ողջունում է նախագահ Միշելի անձնական ներկայացուցիչ, Քրիստիան Դանիելսոնի Վրաստան այցելությունը և Եվրամիության կողմից աջակցվող երկխոսությանը նրա մասնակցությունը։

«Ցանկանում եմ մեկ անգամ ևս շնոհակալություն հայտնել, Եվրոպական խորհրդի նախագահ, Շառլ Միշելին և նշել, որ բարձր եմ գնահատում նրա աջակցությունը։ Ինչ վերաբերում է նախագահ Միշելին անձնական ներկայացուցիչ, Քրիստիան Դանիելսոնի Վրաստանի այցին, մենք ողջունում ենք դրան և Եվրամիության կողմից աջակցվող երկխոսությանը նրա մասնակցությունը, համոզված ենք, որ նրա մասնակցությունը կնպաստի գործընթացների կառուցողական կառավարմանը: Այստեղ ուզում եմ շեշտել, որ մենք պատրաստ ենք շարունակել կառուցողական երկխոսության ռեժիմը: Մենք լիովին կիսում ենք Եվրոպայի խորհրդի հանձնարարականն ու խորհուրդը, որ որքան հնարավոր է շուտ ընդդիմությունը և կառավարությունը գտնեն ընդհանուր լեզու և ընդհանուր համաձայնության գան, որպեսզի մեր խորհրդարանը կարողանա սկսել բնականոն աշխատանքը և երկիրը վերադարձնել բնականոն քաղաքական կյանքին: Ամենակարևորը ՝ մենք բոլորս պետք է առաջնորդվենք վրաց ժողովրդի և մեր պետության շահերով», – հայտարարել է Իրակլի Ղարիբաշվիլին: