Ուկրաինայի պաշտպանության նախարար Ալեքսեյ Ռեզնիկովը հայտարարում է, որ Ուկրաինայի հակահարվածի ակնկալիքները չափազանց մեծ են։ Այս մասին նա հայտարարել է ամերիկյան «Washington Post» հրատարակությանը տված հարցազրույցում։

«Մարդկանց մեծամասնությունը ինչ-որ մեծ բանի է սպասում»,- ասել է Ռեզնիկովը՝ նշելով, որ այդ մարդիկ, ամենայն հավանականությամբ, հիասթափված կլինեն։

Ռեզնիկովի խոսքով՝ արևմտյան գործընկերներն իրեն ասել են, որ «հաջողության ևս մեկ օրինակ է պետք», որը պետք է ցույց տան սեփական ընտրողներին։

«Բայց ես չեմ կարող ձեզ ասել, թե ինչպիսին կլինի այս հաջողության մասշտաբը՝ 10 կիլոմետր, 30 կիլոմետր, 50 կիլոմետր, 100 կիլոմետր, 200 կիլոմետր»,- ասում է Ուկրաինայի պաշտպանության նախարարը։

Ռեզնիկովի խոսքով՝ Ուկրաինայի զինված ուժերի ոչ բոլոր ստորաբաժանումներն են պատրաստ հակահարձակման, քանի որ զինվորականների մի մասը պատրաստություն է անցնում ՆԱՏՕ-ի անդամ երկրներում։

«The Washington Post»-ը գրում է, որ հարձակողական գործողությունը սովորաբար մեծ առավելություն է պահանջում, և քանի որ ռուսական ուժերը պաշտպանական դիրքում են գտնվում 1400 կիլոմետր երկարությամբ առաջնագծի ողջ երկայնքով, դժվար է ասել, թե Ուկրաինան ինչքանով կշարժվի։

Հրատարակության համաձայն՝ ուժերի մոբիլիզացիան, որի մանրամասները գաղտնի են մնում, ստիպում է ուկրաինացի բարձրաստիճան պաշտոնյաներին մտածել, թե ինչպիսի արդյունք կլինի բավական՝ տպավորելու Արևմուտքը, հատկապես Վաշինգտոնում։ Ոմանք մտավախություն ունեն, որ եթե Ուկրաինան ձախողվի, Կիևը կարող է մնալ առանց միջազգային ռազմական օգնության կամ հարկադրված լինել նստել Մոսկվայի հետ բանակցությունների սեղանի շուրջ:

«Washington Post»-ի փոխանցմամբ՝ նման բանակցությունները, ամենայն հավանականությամբ, կներառեն Ռուսաստանի ինքնիշխան ուկրաինական տարածքների մի մասի փոխանցման պահանջը, որն Ուկրաինան անընդունելի է անվանել։