Ալեքսանդրե Ծուլաձեն Times Higher Education-ի հետազոտությունների տնօրենի հետ քննարկել է ապագա համագործակցության հեռանկարները
Վրաստանի կրթության, գիտության և երիտասարդության նախարար Ալեքսանդրե Ծուլաձեն Լոնդոն կատարած այցի շրջանակներում աշխատանքային հանդիպում է ունեցել Times Higher Education-ի հետազոտությունների տնօրեն Իշան Քադերի հետ։ Այս մասին տեղեկատվություն է տարածում Կրթության նախարարությունը։
Գերատեսչության փոխանցմամբ, հանդիպման ընթացքում կողմերը քննարկել են Տրանսազգային կրթության ուղեցույցի գործնականում կիրառման կոնկրետ ուղղությունները և ապագա համագործակցության հեռանկարները։
«Ինչպես նշեց Ալեքսանդրե Ծուլաձեն, վրաց-բրիտանական տրանսազգային կրթության ուղեցույցը, որը մշակվել է Times Higher Education-ի հետազոտության արդյունքների հիման վրա և հաշվի առնելով երկրի առաջնահերթությունները, արտացոլում է վրացական և բրիտանական համալսարանների միջև ակադեմիական գործընկերության ամրապնդմանն ուղղված կոնկրետ գործողություններ, որոնք կնպաստեն կրթության ոլորտում վրաց-բրիտանական կապերի ամրապնդմանը»:
Նախարարի խոսքով՝ նախարարության նպատակն է ապահովել, որ վրացի և միջազգային ուսանողները հնարավորություն ունենան տեղում՝ Վրաստանում, ստանալ բարձրորակ բրիտանական կրթություն և որակավորումներ։ Ահա թե ինչու նախարարությունը ստեղծում է բոլոր պայմանները Տրանսազգային կրթության ուղեցույցի արդյունավետ ներդրման համար։
Իր հերթին, Times Higher Education-ի հետազոտությունների տնօրենը դրական գնահատեց Վրաստանի կողմից միջազգային կրթության զարգացմանը նպաստելու ուղղությամբ ձեռնարկված քայլերը և հայտնեց վրացական կողմի հետ համագործակցելու իր պատրաստակամությունը։ Աշխատանքային հանդիպմանը մասնակցել են Վրաստանի կրթության, գիտության և երիտասարդության նախարարի տեղակալ Բայա Կվիցիանին և Բրիտանական խորհրդի վրաստանյան գրասենյակի տնօրեն Զազա Փուրցելաձեն։
Հարկ է նշել, որ Times Higher Education-ը, Կրթության, գիտության և երիտասարդության նախարարության և Բրիտանական խորհրդի հետ համագործակցությամբ, իրականացրել է միջազգային կրթության խորը ուսումնասիրություն, որի հիման վրա մշակվել է միջազգային կրթության ուղեցույց։ Ալեքսանդրե Ծուլաձեն Լոնդոն այցի ընթացքում շահագրգիռ կողմերին կներկայացնի Տրանսազգային կրթության ուղեցույցը», – ասվում է Կրթության նախարարության հայտարարության մեջ։