Ալբանիայում ուսանողները երրորդ օրն է, ինչ պահանջում են երկրի վարչապետի հրաժարականը՝ բարձրագույն կրթության համակարգում առկա խնդիրների պատճառով, իսկ ոստիկանությունը ջրցան մեքենաներ է օգտագործում բողոքի ցույցը ցրելու համար
Ալբանիայում ուսանողական բողոքի ցույցերը շարունակվում են արդեն երրորդ օրը։ Ըստ «Ռոյթերս»-ի՝ ոստիկանությունը ջրցան մեքենաներ է օգտագործել ցուցարարներին ցրելու համար։
Ցուցարարները կոտրել են Տիրանայի շենքերի պատուհանները՝ ստիպելով խորհրդարանին դադարեցնել նիստը։
Բողոքի ցույցի կազմակերպիչների խոսքով՝ բողոքի ցույցերի պատճառներն են բարձրագույն կրթության ծախսերի աճը, ֆինանսական աջակցության բացակայությունը և ավարտելուց հետո զբաղվածության սահմանափակ հնարավորությունները։
Ուսանողները պահանջում են Ալբանիայի վարչապետ Էդի Ռամայի հրաժարականը։
Ռաման ասել է, որ իր պարտականությունն է հաշվի առնել քաղաքացիների արդար պահանջները և հոգ տանել երկրի զարգացման մասին։ Նա ասել է, որ իր պաշտոնից հեռանալը կլինի այն ընտրողների վստահության դավաճանություն, որոնք նրան մանդատ են տվել ավարտելու Եվրամիությանը միանալու բանակցությունները։
«Ինչ վերաբերում է իմ հրաժարականի պահանջներին, կառավարությունները փոխվում են ժողովրդավարական ընտրությունների միջոցով, այլ ոչ թե հեղափոխության։ Մենք ընտրություններ անցկացրինք անցյալ տարի», – ասել է Ռաման «Ռոյթերս»-ին ուղղված գրավոր պատասխանում։
Ալբանիայի վարչապետը հայտարարել է, որ պատրաստ է ուսանողների հետ քննարկել կրթության ծախսերի բարձրացման հարցը, սակայն ասում է, որ հաստատությունների վրա հարձակումները, պետական գույքի ոչնչացումը և հասարակական անվտանգությանը սպառնացող վտանգները որևէ կապ չունեն ուսանողների օրինական պահանջների հետ։