Ազգային պատկերասրահում այսօր հավաքվել էին մշակույթի ոլորտի ներկայացուցիչները։ Հիմնական պահանջը բողոքի ակցիաների ժամանակ ձերբակալված քաղաքացիներին ազատ արձակելն էր։ Նաև երկրում վերընտրությունների անցկացումը։ Արվեստի ոլորտի ներկայացուցիչներն իրենց հետ բերել են Վրաստանի և Եվրամիության դրոշները։ Նրանք հանդիպում են խնդրել Ազգային պատկերասրահի տնօրենի հետ՝ պատկերասրահի շենքի վրա այս դրոշները բարձրացնելու համար, սակայն շենքը փակ է եղել։

Տեղում միջադեպ է տեղի ունեցել. «Publica» հարթակի լրագրող Մինդիա Գաբաձեի խոսքով՝ իր վրա հարձակվել են անհայտ անձինք։ «Publica»-ն կադրեր է հեռարձակում, որտեղ երեւում է, որ մի քանի տղամարդ փախչում են տարածքից։ Իսկ հետո Մինդիա Գաբաձեն երեւում է մայթի վրա պառկած։ Կադրերում երեւում է, որ տարածքում են եղել նաեւ իրավապահները։