Ադրբեջանի Նախիջևան քաղաքում անօդաչու թռչող սարքի պայթյունի հետևանքով երկու մարդ է վիրավորվել։

Ադրբեջանական լրատվամիջոցների համաձայն՝ ևս մեկ անօդաչու թռչող սարք է մտել Շաքարաբադ գյուղ։

Ադրբեջանի արտաքին գործերի նախարարության հայտարարության համաձայն՝ Բաքուն Թեհրանից պահանջում է սեղմ ժամկետներում պարզաբանել վերոհիշյալ հարցը, ներկայացնել բացատրություն և ձեռնարկել անհրաժեշտ ու անհապաղ միջոցներ, որպեսզի ապագայում նման միջադեպերը չկրկնվեն։

Հայտարարության մեջ նշվում է, որ ադրբեջանական կողմն իրեն իրավունք է վերապահում ձեռնարկել համապատասխան պատասխան միջոցներ։

Միևնույն ժամանակ, Ադրբեջանի Հանրապետությունում Իրանի Իսլամական Հանրապետության արտակարգ և լիազոր դեսպան Մոջթաբա Դեմիրչիլուն կանչվել է Ադրբեջանի արտաքին գործերի նախարարություն։