Ադրբեջանի ԱԳՆ. Անջեյ Դուդայի այցը Հայաստան-Ադրբեջան սահմանային գոտի հակաադրբեջանական քաղաքականության ցուցադրություն է, մենք մեզ իրավունք ենք վերապահում ձեռնարկել դիվանագիտական միջոցներ
Ադրբեջանի արտաքին գործերի նախարարությունը ԵՄ դիտորդական առաքելության ուղեկցությամբ Լեհաստանի նախագահ Անջեյ Դուդայի այցը Հայաստան գնահատում է որպես հակաադրբեջանական քաղաքականության հերթական ցուցադրություն և սադրիչ քայլ։
Այս մասին ասվում է X սոցիալական ցանցում Ադրբեջանի արտաքին գործերի նախարարության տարածած հաղորդագրության մեջ։
Ըստ Ադրբեջանի արտաքին գործերի նախարարության հայտարարության՝ Բաքուն իրեն իրավունք է վերապահում դիվանագիտական միջոցներ կիրառել այս ոչ բարեկամական գործողության դեմ։
«Լեհաստանի նախագահ Անջեյ Դուդայի այցը Հայաստան-Ադրբեջան սահմանամերձ գոտի Հայաստանում ԵՄ առաքելության (EUMA) անդամների ուղեկցությամբ, ցավոք, ԵՄ անդամ տարբեր երկրների և եվրոպական կառույցների հակաադրբեջանական քաղաքականության հերթական ցուցադրումն է։ Ցավում ենք, որ երկրի նախագահը, որը պաշտոնապես Ադրբեջանի ռազմավարական գործընկերն է, մասնակցել է անթույլատրելի «ցուցադրական շոուի», որը հանգեցնում է Ադրբեջանի և Լեհաստանի հարաբերությունների սրմանը։ Չնայած Ադրբեջանի պաշտոնյաների բազմաթիվ դիմումներին Լեհաստանի նախագահի վարչակազմին և արտաքին գործերի նախարարությանը, լեհական կողմը զերծ չմնաց այս սադրիչ քայլից։ Ադրբեջանն իրեն իրավունք է վերապահում ձեռնարկել համապատասխան դիվանագիտական միջոցներ այս ոչ բարեկամական քայլի դեմ»,- ասված է Ադրբեջանի ԱԳՆ հաղորդագրության մեջ։
Նոյեմբերի 25-ին Հայաստան է ժամանել Լեհաստանի նախագահ Անջեյ Դուդան։ Այցի շրջանակներում նա եղել է Ադրբեջանի սահմանին, որտեղ հանդիպել է ԵՄ դիտորդական առաքելության լեհ անձնակազմի հետ։
ԵՄ դիտորդական առաքելությունը գումարվել է 2023 թվականի փետրվարին՝ երկու երկրների սահմանին հետպատերազմյան իրավիճակը վերահսկելու և պարեկելու նպատակով։
Լեհաստանի նախագահը Երեւանում հանդիպել է նաեւ Հայաստանի նախագահի եւ վարչապետի հետ։
Նրա խոսքով, Լեհաստանը պատրաստ է անհրաժեշտության դեպքում աջակցել Հայաստանի և Ադրբեջանի միջև հարաբերությունների կայունացմանը։