Ադրբեջանական աղբյուրները հրապարակում են Նախիջևան քաղաքի օդանավակայանի մոտ իրանական անօդաչու թռչող սարքի պայթյունի լուսանկարներ և տեսանյութեր։
Նախիջևանում անօդաչու թռչող սարքի պայթյունի հետևանքով վիրավորվել է երկու մարդ։ Ադրբեջանական լրատվամիջոցների փոխանցմամբ՝ մեկ այլ անօդաչու թռչող սարք է թռել Շեքարաբադ գյուղ։
Օդանավակայանի մոտ գտնվող դպրոցներում ուսումնական գործընթացը դադարեցվել է, իսկ ուսուցիչներն ու աշակերտները տարհանվել են։
Ադրբեջանի արտաքին գործերի նախարարության հայտարարության համաձայն՝ Բաքուն պահանջում է, որ Թեհրանը հնարավորինս շուտ պարզաբանի վերոնշյալ հարցը, բացատրություն տա և ձեռնարկի անհրաժեշտ և անհապաղ միջոցներ՝ ապագայում նմանատիպ միջադեպերի կրկնությունը կանխելու համար։ Հայտարարության մեջ նշվում է, որ ադրբեջանական կողմը իրավունք է վերապահում ձեռնարկել համապատասխան պատասխան միջոցներ։
Բացի այդ, Ադրբեջանի արտաքին գործերի նախարարություն է կանչվել Իրանի Իսլամական Հանրապետության արտակարգ և լիազոր դեսպան Մոջթաբա Դերմիչիլուն։
