Վստահ եմ, որ մենք համաձայնության կհասնենք Միացյալ Նահանգների հետ,- ասել է Իրանի արտաքին գործերի նախարար Աբբաս Արաղչին։

Արաղչիի խոսքով՝ Իրանը կորցրել է վստահությունը Միացյալ Նահանգների նկատմամբ, չնայած Իրանի արտաքին գործերի նախարարը նշում է, որ գործընկեր երկրների միջոցով հաղորդագրությունների փոխանակումը նպաստում է Միացյալ Նահանգների հետ «արդյունավետ» բանակցություններին։

Իրանի արտաքին գործերի նախարարի խոսքով՝ բանակցությունները պետք է վերաբերեն միայն Իրանի միջուկային ծրագրին։ Դրա դիմաց Իրանը պահանջում է ԱՄՆ պատժամիջոցների վերացում և խաղաղ նպատակներով ուրանի հարստացումը շարունակելու իրավունք։

«Մենք չպետք է խոսենք այն հարցերի մասին, որոնց վերաբերյալ համաձայնություն չկա։ Եկեք չկորցնենք հնարավորությունը և հասնենք արդար համաձայնության, որը կապահովի միջուկային զենքի բացակայությունը։ Սա, ինչպես ասացի, հնարավոր է, նույնիսկ կարճ ժամանակում», – ասել է Արաղչին։

Իրանի արտաքին գործերի նախարարի խոսքով՝ եթե բանակցությունները ձախողվեն, Իրանը պատրաստ է պատերազմի։ Աբբաս Արաղչին ասել է, որ պատերազմը «աղետ կլինի բոլորի համար», և որ տարածաշրջանում գտնվող ամերիկյան բազաները կդառնան Իրանի ռազմական թիրախներ։

Խոսելով Իրանում հակակառավարական բողոքի ցույցերի մասին՝ Արաղչին մեղադրել է «ահաբեկչական ուժերին», որոնք հրամաններ են ստանում դրսից։

«Ցուցարարներին մահապատժի ենթարկելու կամ կախաղան բարձրացնելու որևէ ծրագիր չի եղել», – ասել է Արաղչին։