Տաջիկստան կատարած այցի ընթացքում տեղի ունեցան կարևոր երկկողմ հանդիպումներ, և ստորագրվեցին շատ կարևոր համաձայնագրեր, որոնք կամրապնդեն երկրների միջև տնտեսական կապերը,- ասաց էկոնոմիկայի և կայուն զարգացման նախարար Մարիամ Քվրիվիշվիլին՝ գնահատելով վարչապետ Իրակլի Կոբախիձեի գլխավորած Վրաստանի կառավարական պատվիրակության այցը Տաջիկստանի Հանրապետություն։

Ինչպես նշեց Մարիամ Քվրիվիշվիլին, այցի ընթացքում ստորագրվեց օդային տարածքի վերաբերյալ համաձայնագիր, որը, ըստ նրա, քայլ կլինի երկու երկրների մայրաքաղաքների միջև ուղիղ օդային երթևեկության մեկնարկը արագացնելու ուղղությամբ։

«Հանդիպումների ընթացքում մեծ ուշադրություն դարձվեց Վրաստանի և Տաջիկստանի միջև զբոսաշրջության ոլորտում կապերի ամրապնդմանը, ինչը, իհարկե, կապահովի նաև տնտեսական կապերի ամրապնդումը», – նշեց էկոնոմիկայի նախարարը։

Բացի այդ, ըստ Մարիամ Քվրիվիշվիլիի, ընդգծվեց Վրաստանի ամենակարևոր դերը՝ որպես Ասիայի և Եվրոպայի միջև կապող օղակ։ Ուշադրություն դարձվեց այն նախագծերի կարևորությանը, որոնք Վրաստանի կառավարությունն իրականացնում է տրանսպորտի և լոգիստիկայի ոլորտի զարգացման ուղղությամբ։

«Դրանց թվում նշվեցին Անակլիայի խորջրյա նավահանգստի նախագծերը, ինչպես նաև վրացական երկաթուղու արդիականացումը, որոնք շատ կարևոր են և մեծ արժեք ունեն մեր գործընկեր երկրների համար, քանի որ նրանք Վրաստանի միջոցով կկապվեն իրենց արտահանման երկրների հետ», – ասաց էկոնոմիկայի և կայուն զարգացման նախարարը։