Իրակլի Կոբախիձեն պաշտոնական այցով ժամանել է Ղազախստանի Հանրապետություն
Վրաստանի վարչապետ Իրակլի Կոբախիձեն պաշտոնական այցով ժամանել է Ղազախստանի Հանրապետություն։
Աստանայի միջազգային օդանավակայանում Վրաստանի կառավարության ղեկավարին դիմավորել է Ղազախստանի Հանրապետության տրանսպորտի նախարար Նուրլան Սաուրանբաևը։
Վրաստանի վարչապետի պաշտոնական դիմավորման արարողությունը տեղի կունենա այսօր Ղազախստանի Անկախության պալատում։ Իրակլի Կոբախիձեին կընդունի Ղազախստանի Հանրապետության նախագահ Կասիմ-Ժոմարտ Տոկաևը։ Նախատեսված են Վրաստանի վարչապետի և Ղազախստանի Հանրապետության նախագահի հանդիպումներ՝ դեմ առ դեմ և ընդլայնված կազմով, որից հետո երկու երկրների համապատասխան գերատեսչությունների միջև կստորագրվեն տարբեր ոլորտներում համագործակցության համաձայնագրեր։
Պաշտոնական այցի շրջանակներում կկայանա Վրաստանի կառավարության ղեկավարի հանդիպումը Ղազախստանի Հանրապետության վարչապետ Օլժաս Բեկտենովի հետ։ Հանդիպմանը կմասնակցեն երկու երկրների նախարարների կաբինետների անդամները։
Վրաստանի վարչապետը այցելել է Ղազախստան պատվիրակությամբ, որի կազմում են փոխվարչապետ և արտաքին գործերի նախարար Մակա Բոճորիշվիլին, էկոնոմիկայի և կայուն զարգացման նախարար Մարիամ Կվրիվիշվիլին, շրջակա միջավայրի և գյուղատնտեսության նախարար Դավիթ Սոնղուլաշվիլին և կառավարության աշխատակազմի ղեկավար Լևան Ժորժոլիանին։