«Анеҩстәи ашықәс азы Вашингтон  имҩаҧысуа асаммит аан НАТО ашҟа Қырҭтәыла алалара азҵаараҿы адгылара ҕәҕәа ҳзаадырҧшыроуп, уи ҳара ҳзы аҵакы ду амоуп», — иҳәеит Қырҭтәыла апарламент ахантәаҩы Шьалуа Папуашвили.

Папуашвили ишиҳәаз ала, Қырҭтәыла, апараметрқәа зегьы рыла алахәызааразы ихиоуп, НАТО аполитикатә аӡбара аднакылароуп

«Иааиуа ашықәс азы Вашингтон имҩаҧысуа асаммит аҵакы ду амоуп, уи аиубилеитә саммитхоит, ари аформатаҿ дара  ашәарҭадара аиқәыршәара аусаҿ НАТО инанагӡо ароль цқьа иазхәыцроуп.  Убри аҟынтә,  Вашингтон  имҩаҧысуа асаммит аан НАТО ашҟа Қырҭтәыла алалара азҵаараҿы адгылара ҕәҕәа ҳзаадырҧшыроуп, уи ҳара ҳзы аҵакы ду амоуп.  Ҳара НАТО аҟынтә иҳамазар ҳҭахуп алианс ашҟа Қырҭтәыла алалара иазку  аконкреттә азнеишьа.  Қырҭтәыла НАТО апартниорс иҟоижьҭеи акрыҵуеит. Ҳхымҩаҧгашьеи ашәарҭадара азҵаарақәа рахь иҟаҳҵо алагалеи рыла,   ҳара  алианс алахәыла иеиҧш ҳхы мҩаҧаагоит. Иара убас, ҳбџьармчқәа НАТО астандартқәа ирышьашәалоуп. Ҳконтингент НАТО амиссиақәа ирылахәын.  Абри зегьы аишьашәалазаара еиқәнаршәоит. Ҳтәыла адемократиатә институтқәеи НАТО иалоу атәылақәа рдемократиатә институтқәеи еиҿаҳарҧшыр, лабҿаба иаабоит НАТО алаларазы иашьашәалоу астандарт шҳамоу.  Қырҭтәыла НАТО алаларазы ихиоуп, уажәы НАТО аполитикатә аӡбара аднакылароуп», — иҳәеит Шьалуа  Папуашвили.