Рикоттәи ахыҵырҭаҿ амҩа хада аргылара хыркәшоуп, 52 километр иаҟароу 4 цәаҳәактәи амҩатә цыҧҵәаха аартызаауеит ҧхынҷкәын 30 шьыбжьон инаркны.

«Амагистраль ҿыц ҳаамҭазтәи арлашаратә системала еибыҭоуп, амҩатә шәарҭадара жәларбжьаратәи астандартқәа ирышьашәалоуп», — иануп Қырҭтәыла аиҳабыра ринформациаҿы.

Қырҭтәыла Аинфраструктура аминистрра адыррақәа рыла, амҩа ҿыц абзоурала, амаршрут  8 километрак рыла икьаҿхоит, уи ахысразы ҩынтә иаҳа имаҷны аамҭа аҭаххоит.

Рикоттәи амагистраль жәларбжьаратәи автомобилтә корридор Мрагылара–Мраҭашәара  (E60) аҿы зҵакы дуу цыҧҵәахоуп, иара убас, Қырҭтәыла атранспорттә аҳа ахадаратә инфрасруктуратә проектқәа иреиуп. Апроект аҧара аларҵеит Азиатәи аҿиара абанки  (ADB), Европатәи аинвестициатә банки  (EIB), Адунеи абанки (WB) Қырҭтәыла аҳәынҭқарратә биуџьети. Апроект иазалхын  2,6 миллиард лари.