Европа ахеилак апарламенттә ассамблеиа (PACE) ахада Теодорос Русопулос ишааицҳаз, “Атәым нырра аартызаара иазку” азакәан иадҳәаланы Венециатәи акомиссиа агәаанагара иашьҭанеиуа амчыбжь азы цәырнагоит.

Теодорос Русопулос ишааиыцҳаз, ақырҭуа закәанԥҵаҩцәа рахь ааԥхьара ҟаиҵеит азакәан амч аиуаанӡа, Венециатәи акомиссиа абжьагарақәа зегьы иазыԥхьагәарҭарц.

Европа ахеилак апарламенттә ассамблеиа (PACE) ахада Қарҭ, апарламент аԥхьа аҭыԥ змаз ахҭысқәа дрыхцәажәеит.

“Аполициаа ипропорциам амч рхы иадырхәеит ҳәа адыррақәа иаартны иҭҵаатәуп, иашьашәалоу ақәҿыҭра аҭатәуп, азакәан иадҳәаланы ирымоу агәаанагара иахәамԥшыкәа, анапхгара амитинг алахәылацәеи, активистцәеи, ажурналистцәеи, апарламент алахәылацәеи рыхьчаразы алшо зегь ҟанаҵароуп”, – иҳәеит Теодорос Русопулос.

Апарламент ахԥатәи аԥхьарала “Атәым нырра аартызаара иазку” азакәанпроект аднакылеит. Азакәанпроект иадгылеит 84-ҩык апарламентарцәа, иаҿагылеит 30-ҩык.