Ацентртә алхратә комиссиа иахьатәи еилатәараҿ Қарҭ ахада иҭыԥ азы алхрақәа аҩбатәи ртур алҵшәақәа реиихшьаалақәа цәырнагеит.

Алҵшәақәа рыла, Қарҭ ахадас далхуп апартиа “Ақырҭуа гәахәтәы – адемократиатә Қырҭтәыл” аҟынтә акандидат Каха Калаӡе, уи 258776-ҩык алхыҩцәа рыбжьқәа иоуит – 55.60%. Қарҭ ахада иҭыԥ азы алхрақәа аҩбатәи ртур рпозициақәа аадырԥшит 480302-ҩык алхыҩцәа. Ацентртә алхратә комиссиа иахьатәи еилатәараҿ Қарҭтәи сакребуло ахь 2021 шықәса жьҭаара 2 рзы имҩаԥгаз алхрақә рылҵшәақәагьы цәырнагеит.

Аихшьаалатә аԥкаанҵа инақәыршәаны, алхрақәа рахь инеит 494676-ҩык алхыҩцәа. Амандатқәа абас ишоуп: “Иаку амилаҭтә ҵысра” – 23 мандат, “Лело” – 2, “Гахариа – Қырҭтәылазы” – 4, “Ақырҭуа гәахәтәы – адемократиатә Қырҭтәыла” – 19, “Зураб Гирчи Џьаԥариӡе” – 1, “Анна Долиӡе ажәлар рзы” – 1.