Евроеидгыла атәылақәа, Венгриа аҧыза-министр Виктор Орбан иҟынтә адгылара аиуразы, урыстәылатәи анефҭ аимпорт азҵааразы акомпромисс аҧшаара иаҿуп. Аҭыжьымҭа  «Politico» ари аинформациа аланарҵәеит адипломатцәа рдыррақәа шьаҭас иҟаҵаны.

Аҭыжьымҭа ишану ала, аҵыхәтәантәи амзазы венгриатәи алидер урыстәылатәи анефҭ аимпорт ақәиҭымтәра иазку аиқәшаҳаҭра  адкылара дақәшаҳаҭымхеит. Иара ишиҳәаз ала, абри аҩыза аӡбара венгриатәи економика иаҧырхагахар ауеит.

Астатиаҿы ишазгәаҭоу ала, уажәы адипломатцәа  урыстәылатәи анефҭ аимпорт зынӡа ақәиҭымтәра ацынхәрас, даҽа вариант аус адырулоит, лымкаала, атанкерқәа рыла аӡа агара иақәшаҳаҭхар ҟалап. Амшын ашҟа аҭыҵырҭа змам Венгриа амҩангагақәа рыла урыстәылатәи анефҭ аахәара алшоит.

Bloomberg адыррақәа рыла, Евроеидгыла ажәалагала ҟанаҵеит Урыстәылантә амшынла анефҭ аимпорт мацара аҧкра иадҳәаланы, убри ала Венгриа апроблема рыӡбар рҭахуп.